कांग्रेसक राष्ट्रीय अध्यक्ष मल्लिकार्जुन खड़गे रविकेँ एकटा रैलीकेँ संबोधित कयलथि। ओहिठाम ओ राज्यमे सत्तारूढ़ भाजपा आ जदयूकेँ घेरैत भाजपा पर झूठ बाजय केर आ मुख्यमंत्री नीतीश कुमार पर बेर-बेर पाला बदल’ केर आरोप लगौलथि।
कांग्रेस अध्यक्ष कहला जे भाजपा आ जदयू वला लोग ‘डबल इंजन’ केर सरकारक बात करैत छथि, मुदा आइ बिहार ह्यूमैन इंडेक्सक मामिलामे बहुत नीचाँ अछि। ओ कहला जे बिहारकेँ ‘डबल इंजन’ नहि, बल्कि एक्कहिटा पावरफुल इंजनक जरूरत अछि, जे महागठबंधन केर इंजन अछि।
कांग्रेस नेता खड़गे बिहारक एनडीए सरकार पर हमला करैत कहलथि जे प्रधानमंत्री आ नीतीश कुमारक बीच ‘अवसरवादी’ गठबंधन बिहारक लोक लेल नीक नहि अछि।
ओ कहलनि जे वक्फ (संशोधन) अधिनियम समुदाय सभक बीच विभाजन पैदा करबाक लेल भाजपा-आरएसएसक साजिश अछि। ओ नीतीश कुमारकेँ लक्ष्य बना क’ कहला जे ओ “इधर-उधरक खेल” खेलाइत रहैत छथि। ओ लोक सभसँ आह्वान करैत कहलनि जे बिहारक प्रगति, उन्नति आ एतय केर शैक्षणिक स्तरक सुधारक लेल भाजपाकेँ हटाबी, नीतीश कुमारकेँ हटाबी।
मल्लिकार्जुन खड़गे कहलनि जे भारतीय जनता पार्टीक नेता आब बिहारक जनताकेँ बहका नहि सकैत छथि। बिहारक लोक एहि बेरक चुनावमे हुनक बहकावामे नहि आबि रहल छथि। ओ लोक सभकेँ एकटा ऑडियो सुनाबैत प्रधानमंत्री नरेंद्र मोदी पर झूठ बाजबाक आरोप लगौलनि आ कहलनि जे ओ बिहारकेँ एक लाख 25 हजार करोड़क विशेष पैकेज देबाक वादा कयने छलथि, मुदा आइ धरि बिहारकेँ किछु नहि भेटल।
ओ कहलनि जे कांग्रेस पार्टीकेँ झुकाबऽ केर कोशिश कएल जा रहल अछि, मुदा कांग्रेस पार्टी झुकत नहि। बिहारमे महागठबंधनक सरकार बनाब’क आह्वान करैत कांग्रेस नेता कहलनि जे हमरा संविधानकेँ बचेबाक लेल एकजुट रहि कऽ लड़ाई लड़य केर आवश्यकता अछि।
राज्यसभामे नेता प्रतिपक्ष खड़गे कहला कि भाजपा झूठ बाजि एतय धरि पहुँचि सकल अछि। आइ बिहार मात्र नहि, देशक लोक बेरोजगारीसँ पीड़ित छथि। कांग्रेस देशकेँ आईआईएम, आईआईटी आ एम्स देलक, मुदा ई सभ की बनेलथि ? ई सभ मात्र झूठक फैक्ट्री बनौलक। ई सभ देशकेँ गुमराह क’ रहल छथि। ओ कहला कि एक बेर झूठ बाजि क’ लोककेँ फंसा सकैत छी, मुदा सदिखन लेल गुमराह नहि क’ सकैत छी। झूठ बाजि कऽ सभकेँ मूर्ख नहि बनाओल जा सकैत अछि।
