महिला संवाद रथ केर शुरुआत मुख्यमंत्री नीतीश कुमार द्वारा कएल गेल अछि। वास्तवमे, एहि अभियानसँ मुख्यमंत्री नीतीश कुमार बिहारक आधा आबादी महिला वोटर सभकेँ साधय केर कोशिश कऽ रहल छथि। बिहारमे वर्ष 2025 केर अंतमे विधानसभा चुनाव होयत। एहेन समयमे आधा आबादी अर्थात महिला वोटर सभकेँ साधय केर लेल मुख्यमंत्री नीतीश कुमार एकटा अनोखा पहल शुरू कएलनि अछि।
मुख्यमंत्री नीतीश कुमार काल्हि एक अणे मार्गसँ ‘महिला संवाद’ रथकेँ हरियर झंडा देखा कऽ रवाना कयलनि। जनतब जे अलग-अलग जिलामे जाय ई संवाद रथ महिला सभक बीच नीतीश कुमारक काजक जानकारी देत। खास कऽ महिला सशक्तिकरण, नौकरी, रोजगार आ शिक्षा सँग संबंधित सरकारक योजना सभकेँ प्रमुखतासँ बतायत। ई संवाद यात्रासँ महिला सभकेँ ई संदेश देल जायत कि नीतीश कुमारक सरकार महिला सभक हितमे की-की काज कएलक अछि।
विधानसभा चुनावसँ पूर्व नीतीश सरकार महिला वोटरसभकेँ साधयमे जुटल अछि। एकर तहत एहि अभियानकेँ तेज कएल गेल अछि। दू दिन पहिने जदयू कार्यालय पर ‘2025-2030, फेरसँ नीतीश’ क’ नारा दैत आधिकारिक पोस्टर सेहो जारी कएल गेल छल। एहि पोस्टरकेँ वीडियो सेहो जारी कएल गेल छल, जतय सीएम नीतीश कुमारक योजनासभ आ वादासभकेँ बताओल गेल छल।
एहि साल होबयवाला विधानसभा चुनावकेँ देखैत महिला संवाद कार्यक्रमकेँ नीतीश कुमार सरकारक एकटा पैघ पहल मानल जा रहल अछि। एकर तहत राज्यक सभटा गामसभमे जा कऽ महिला लोकनिकेँ सरकारी योजनासभ, महिला सशक्तीकरणसँ जुड़ल मुद्दासभक जानकारी देल जायत।
पटनामे 1,395 स्थान पर महिला संवाद कार्यक्रम आयोजित कएल जायत। एहि कार्यक्रमक दौरान महिला सभकेँ राज्य सरकारक प्रमुख योजनासभसँ अवगत कराओल जायत। जाहिमे महिला सशक्तीकरण नीति 2025, नशा मुक्ति अभियान, महिला आरक्षण योजना, जीविका योजना, मुख्यमंत्री कन्या उत्थान योजना, बालिका पोशाक योजना, महिला आरक्षण योजना, बाल विवाह आ दहेज प्रथा उन्मूलन अभियानक जानकारी देल जायत।
