लोकसभामे विपक्षक नेता राहुल गांधी अगिला सप्ताहमे दू दिन केर अमेरिका दौरा पर जएताह। एहि दौरान कांग्रेस नेता राहुल गांधी ब्राउन यूनिवर्सिटीमे भाषण देताह। ओ फैकल्टी सदस्य आ छात्र लोकनिक संगे बातचीत सेहो करताह।
कांग्रेसक मीडिया आ प्रचार विभागक प्रमुख पवन खेड़ा बृहस्पतिकेँ एहि बातक जानकारी देलनि। पवन खेड़ा सोशल मीडिया प्लेटफॉर्म एक्स पर एकटा पोस्टमे कहलनि, “कांग्रेसक पूर्व अध्यक्ष राहुल गांधी 21 आ 22 अप्रैलकेँ अमेरिकाक ब्राउन यूनिवर्सिटी जएताह। ओहि ठाम भाषण देताह आ यूनिवर्सिटीक फैकल्टी सदस्य तथा छात्र लोकनिक संग बातचीत करताह।”
ओ कहला जे रोड आइलैंड जायसँ पहिने राहुल गांधी एनआरआई समुदायक सदस्यक संग-संग इंडियन ओवरसीज कांग्रेस (आईओसी) केर पदाधिकारी आ सदस्य सभसँ सेहो भेंट करताह।
जनतब जे एहिसँ पहिने पिछला वर्ष सितम्बरमे राहुल गांधी अमेरिकाक तीन दिवसीय यात्रा कएलनि। अपन यात्राक दौरान राहुल गांधी टेक्सास विश्वविद्यालयक छात्र, शिक्षण समुदायसँ जुरल लोकसँ बातचीत कएलनि। अमेरिकाक टेक्सासमे भारतमे रोजगार पर बात करैत समय राहुल गांधी चीनक तारीफ करैत कहलनि जे अमेरिका आ पश्चिमी देश बेरोजगारीक समस्यासँ जूझि रहल अछि, जखनकि चीनमे एहेन नहि छै। एकर पाछू चीनक वैश्विक उत्पादन पर हावी होयब अछि। एखनि पश्चिमी देशमे बेरोजगारीक समस्या अछि। भारतमे सेहो बेरोजगारीक समस्या अछि, मुदा दुनियाक बहुत देशमे एहेन समस्या नहि अछि। चीनमे बेरोजगारीक समस्या नहि अछि। वियतनाममे सेहो बेरोजगारीक समस्या नहि अछि।
एकर अलावा राहुल गांधी टेक्सास यूनिवर्सिटीमे छात्र सभक संग बातचीत केर दौरान भारतीय जनता पार्टी (भाजपा) आ आरएसएस पर निशाना साधलन्हि। कांग्रेस नेता कहलन्हि जे भाजपा आ कांग्रेसक बीच विचारधारात्मक संघर्ष अछि। भाजपा आ आरएसएसक माननाई अछि जे महिलाकेँ अपन पारंपरिक भूमिका तक सीमित रहबाक चाही। एकर विपरीत हमर माननाई अछि जे महिलाकेँ ओ सभ काज करबाक आज़ादी होयबाक चाही, जे ओ सभ करय चाहैत छथि।
