नामेटा छन्हि ममता, भीतर भरल छनि क्रूरता : बंगाल हिंसा पर नित्यानंद राय

बंगाल हिंसा पर नित्यानंद राय, ममता बनर्जीकेँ लेल कहलनि “हुनका अंदर क्रूरता अछि”
*
पटना समदिया
*

नित्यानंद राय कहला जे जकरा विकास पसंद अछि, जकरा भारत माताक जय पसंद अछि, जे विकास चाहैत अछि ओ सब एनडीएमे अछि। परिवारवादी आ तुष्टिकरण वाला लोक ओम्हर छथि।

नव वक्फ कानून बनलाक बाद देशक कतेको भागमे विरोध प्रदर्शन जारी अछि, मुदा बंगालमे एहि नव अधिनियमकेँ लऽ कऽ हिंसा एतेक भड़कि गेल जाहिमे तीन लोककेँ अपन जान तक गवांबय पड़ल आ कतेको घर उजरि गेल, कतेको लोककेँ अपन-अपन घर-द्वारि आ बस्ती छोड़ि भागय पड़ल। एहि लेल सीएम ममता विरोधी सभक निशाना पर छथि।

एहि घटना पर केंद्रीय मंत्री नित्यानंद राय कहला जे सभ कारणक जड़ि ममता बनर्जी छथि, हुनकर नामेटा ममता अछि, भीतर क्रूरता भरल अछि। ओ पटनामे बृहस्पतिकेँ पत्रकार सभसँ बात करैत छलाह।

केंद्रीय मंत्री कहलनि जे “तुष्टिकरण नीतिक तहत सत्ता आ वोटक खातिर जे अपराध भ’ रहल अछि, से ममताजीक कारण भ’ रहल अछि। जनता सभ देखि रहल अछि ममता जीक नाम सिर्फ ममता अछि। अंदरसँ हुनकामे कोनो ममता नहि अछि। हुनकामे क्रूरता भरल अछि।”

नित्यानंद राय आगू कहलनि जे ममता बनर्जी जे कए रहल छथि, से ठीक नहि अछि। नीतीश कुमार आ नायडू पर ममता बनर्जीक बयान पर नित्यानंद राय कहलनि जे ‘सबका विकास सबका साथ’ 2047 तक विकसित भारत होय। जिनका विकास पसंद अछि, जिनका भारत माताक जय पसंद अछि, जे विकास चाहैत छथि, ओ सभ एनडीएमे छथि। परिवारवादी आ तुष्टिकरण वाला लोक सभ ओम्हर छथि, जे देशकेँ नोकासन पहुँचेबाक काज करैत छथि।