मंत्री सभक वेतन आ विभिन्न प्रकारक भत्ता सेहो बिहार केबिनेट मंगलकेँ बढ़ा देलक अछि।
बिहार मंत्रिमंडलक मङ्गलकेँ भेल बैठकमे स्वास्थ्य विभागमे 20 हजारसँ बेसी पदक सृजनक मंजूरी भेटल अछि। एहि केर अलावा मंत्रिमंडल सचिवालय विभागक उर्दू निदेशालयक अंतर्गत राज्यक विभिन्न कार्यालय सभमे सहायक उर्दू अनुवादकक 3,300 सँ बेसी पदक सृजनक प्रस्तावक मंजूरी देल गेल। एहि तरहेँ एहि चुनावी वर्षमे पैघ संख्यामे नौकरी देबाक मार्ग खुजि गेल अछि।
मंत्रिमंडलक बैसारक बाद कहल गेल जे मुख्यमंत्री नीतीश कुमारक अध्यक्षतामे भेल एहि बैठकमे कुल 27 प्रस्ताव सभक मंजूरी देल गेल। बैठकमे स्वास्थ्य विभागक अंतर्गत लोक स्वास्थ्य संवर्ग आ अस्पताल प्रबंधन संवर्गक गठनक लेल आवश्यक विभिन्न स्तरक कुल 20,016 अतिरिक्त पदक सृजनक स्वीकृति देल गेल।
एहि केर अतिरिक्त मंत्रिमंडल सचिवालय विभाग, उर्दू निदेशालयक अधीन बिहार राज्य उर्दू अनुवादक संवर्ग नियमावली – 2016 केर तहत मूल कोटिक पद सहायक उर्दू अनुवादकक बिहार राज्यक विभिन्न कार्यालय सभ लेल पूर्वसँ सृजित 1,653 पदकेँ प्रत्यर्पित करैत राज्यक विभिन्न कार्यालय सभमे सहायक उर्दू अनुवादकक 3,306 पदक सृजनक सेहो स्वीकृति देल गेल।
चुनावी वर्षमे मुख्यमंत्री नीतीश कुमार राज्यक मंत्री आ उप मंत्री सभक वेतन-भत्तामे बढ़ोतरी कएलक अछि। एहिसँ सम्बन्धित बैसारमे बिहारक मंत्री (वेतन आ भत्ते) समय-समय पर यथा संशोधित नियमावली – 2006 मे संशोधनक मंजूरी देल गेल। सरकारक एहि निर्णयक बाद मंत्रिक वेतन आ भत्तामे बढ़ोतरी होयत। राज्यक मंत्री आ उप मंत्रीक लेल अनुमन्य वेतन आ भत्तामे कएल गेल संशोधनमें वेतन आ भत्तामे दुनूमे भारी बढ़ोतरी कएल गेल अछि।
राज्यक मंत्री आ उप मंत्रीक मासिक वेतनकेँ 50,000 रुपयासँ बढ़ा कऽ 65,000 रुपया कएल गेल अछि। एहि तरहसँ क्षेत्रीय भत्ताकेँ 55,000 रुपयासँ बढ़ा कऽ 70,000 रुपया कएल गेल अछि। संगहि, दैनिक भत्ता आ आतिथ्य भत्तामे सेहो बढ़ोतरी कएल गेल अछि।
