कांग्रेसक बिहार चुनावमे जोरदार तैयारीक देखैत ई अंदेशा लगाओल जा रहल छल जे राजद आ कांग्रेसमे ठनत आ से आब खुल्लमखुल्ला बयानबाजी शुरू भऽ गेल अछि।
कांग्रेस आ आरजेडी केर बीच सीटक लेल तालमेल होयबामे कठिनाइ देखा रहल अछि। कोनो हालमे कांग्रेस कम सीट लेबा लेल तैयार नहि अछि।
एम्हर आरजेडी प्रवक्ता मृत्युंजय तिवारी दावा कयलनि अछि जे बिहार विधानसभा चुनावक लेल पार्टीक सभ 243 सीट पर तैयारी शुरू भऽ चुकल अछि। एहि बयानसँ साफ अछि जे कांग्रेसक तरफसँ जे प्रेशर पॉलिटिक्स चलि रहल अछि, ताहि केर बीच आरजेडी अपन सहयोगी कांग्रेसकेँ पैघ संदेश देलक अछि।
दरअसल राहुल गांधी चुनावी सालमे तीन बेर बिहार आबि चुकल छथि। दलित समाजसँ आबऽ वाला राजेश रामकेँ प्रदेश अध्यक्ष बनाओल गेल। युवा चेहरा कन्हैया कुमारकेँ आगू कयल गेल। पलायन रोजगार केर लेल पदयात्रा कऽ रहल छथि। ई ओ मुद्दा सभ अछि जे तेजस्वी उठाबैत रहैत छथि। ई आरजेडी केर टॉप चुनावी मुद्दा अछि। पदयात्रामे राहुल स्वयं शामिल भेलथि। तेजस्वीकेँ महागठबंधनक सीएम उम्मीदवार कांग्रेस नहि मानि रहल अछि।
कांग्रेस लोकसभा चुनावक अपन नीक स्ट्राइक रेटक हवाला दऽ रहल अछि जे 9 टा सीट पर लड़ि 3 टा जीतल। जखनकि राजद 22 सीट पर लड़ि 4 जीतल। निर्दलीय सांसद पप्पू यादवकेँ अहमदाबादमे कांग्रेसक आगामी अधिवेशनमे शामिल होएबाक लेल निमंत्रण देल गेल। पप्पू यादवक कांग्रेसमे प्रवेश बिहार चुनावक दृष्टिगत एकटा महत्वपूर्ण निर्णय मानल जा रहल अछि। एखनि प्रश्न उठि रहल अछि जे की एहि सभक माध्यमसँ बेसी सीटक लेल राजद पर कांग्रेस दबाब बढ़ा रहल अछि ?
एहि बीच आरजेडी प्रवक्ता मृत्युंजय तिवारी दावा कएलनि जे आरजेडी केर तैयारी सभ 243 सीट पर चलि रहल अछि। तत्पश्चात सहयोगी दलकेँ सीट देल जाएत। हम सभ सीट पर मजबूत रहब तखने सहयोगी दलकेँ मदद कऽ सकब। एहि बयानसँ कतेको तरहक प्रश्न उठि रहल अछि।ओतहि ओ कहलनि जे पप्पू यादवकेँ कांग्रेसक अधिवेशनमे बजाएब कांग्रेस पार्टीक मामिला अछि। हमरा एहिसँ की मतलब ?
मृत्युंजय तिवारी कहलथि जे रोजगार पलायन तेजस्वीक टॉप चुनावी मुद्दा अछि। एहि मुद्दा पर घर-घर आरजेडीक कार्यकर्ता जा रहल छथि। 2020 केर चुनावमे सेहो आरजेडीक ई मुद्दा छल। तेजस्वी महागठबंधन केर सीएम कैंडिडेट छैथ, एकरा ल’ क’ ककरो कोनो कंफ्यूजन नहि रहबाक चाही।
एहि बयानक बाद जेडीयू सेहो कहलक अछि जे बिहारमे आरजेडी सभ 243 सीट पर असगर चुनाव लड़त। प्रवक्ता अरविंद निषाद कहलथि जे राहुल गांधीक बिहारसँ जाइते आरजेडीक दिलक बात जुबान पर आबि गेल। कांग्रेसकेँ सीधा संदेश आरजेडी देलक अछि। दरअसल कांग्रेसकेँ बिहारमे मजबूत होइत आरजेडी नहि देखि सकैत अछि। दुनू पार्टीक बीच कतेको मुद्दा पर मतभेद अछि। राहुल गांधी बिहार अयलाह तऽ पटनामे रहैत हुनक अगुवाई तेजस्वी यादव नहि कएलनि। तेजस्वीकेँ कन्हैया कुमार जेकाँ नेता महागठबंधनक सीएम कैंडिडेट मानबाक लेल तैयार नहि छथि। राजद असगर लड़बाक मोन बना चुकल अछि आ भरिसक कांग्रेस सेहो इएह करत।
