गोदामसँ 300 कार्टून अंग्रेजी शराब बरामद, पुलिस कयलनि खुलासा

मुजफ्फरपुर समदिया
*

बिहारमे शराबबंदी कानून लागू भेलाक बादो शराब तस्कर अपन धंधा नहि छोड़ि रहल अछि। पुलिस आ आबकारी विभाग लगातार कारवाई कs रहल अछि, मुदा शराब माफिया नव-नव तरीका अपना कs अपन धंधा जारी राखने अछि। एही क्रममे आबकारी विभागक टीम मुजफ्फरपुर जिलाक करजा थाना क्षेत्रक सलाहपुरमे छापा मारलक आ 300 कार्टुन अवैध शराब बरामद कयलक अछि। एहि दौरान एकटा आरोपीकेँ गिरफ्तार कयल गेल अछि, जखनि कि मुख्य संचालक फरार भs गेल।

आबकारी थाना प्रमुख दीपक कुमारकेँ गुप्त सूचना भेटल छल जे मुजफ्फरपुर जिलाक करजा थाना क्षेत्रमे अवैध शराबक पैघ खेप एकटा गोदाममे राखल गेल अछि। सूचना भेटैत देरी एकटा विशेष टीम बनाओल गेल आ छापामारी कयल गेल। टीम जखनि मौका पर पहुँचल तs देखलक जे टीनक चादरसँ घेरि कs गोदाम बनाओल गेल अछि।

टीम जखनि भीतर जा कs जांच कयलक तs सैकड़ो कार्टूनमे भारी मात्रामे अवैध शराब भेटल। पुलिस 300 कार्टुन शराब जब्त कs मौका पर मौजूद केयरटेकरकेँ गिरफ्तार कयलक। गिरफ्तार आरोपीक पहिचान जैतपुर थाना क्षेत्रक रेपुरा निवासी राजू कुमारक रूपमे कयल गेल अछि।

गोदामक असली संचालक आ शराबक भंडारण करय वालाक पहिचान भs रहल अछि। पुलिसकेँ शंका अछि जे ई गोदाम शराब तस्करक एकटा पैघ नेटवर्कक हिस्सा छल, जतयसँ अलग-अलग क्षेत्रमे शराबक आपूर्ति होइत छल।
एहि छापामारीक बाद आबकारी थानाक इंस्पेक्टर दीपक कुमार कहलनि जे, जब्त शराब अलग-अलग ब्रांडक अछि आ एकर तस्करीक पाछु एकटा पैघ गिरोह काज कs रहल अछि।

ओ कहलनि जे एकटा आरोपीकेँ गिरफ्तार कयलनि, फरार आरोपीक पता लगेबाक लेल लगातार छापामारी कयल जा रहल अछि।

बिहारमे शराबबंदी कानून लागू रहलाक बावजूद मुजफ्फरपुरमे शराब तस्कर सक्रिय अछि। प्रशासन लगातार कारवाई कs रहल अछि, मुदा शराब माफिया नव-नव तरीका अपना कs कानून केर चुनौती दऽ रहल अछि।