बिहार पर केन्द्र सरकार मेहरबान भ’ गेल अछि। कैबिनेट हाइब्रिड एन्युटी मोड (एचएएम) पर बिहारमे 4-लेन ग्रीनफील्ड आ ब्राउनफील्ड पटना-आरा-सासाराम कॉरिडोर (एनएच-119ए) (120.10 किमी) केर निर्माणक मंजूरी देलक अछि। प्रधानमंत्री नरेन्द्र मोदीक अध्यक्षतामे आर्थिक मामिलाक मंत्रिमंडलीय समिति (सीसीईए) ई फैसला लेलक।
बिहारमे 120 किलोमीटर धरि 4-लेन एक्सेस नियंत्रित ग्रीनफील्ड आ ब्राउनफील्ड पटना-आरा-सासाराम कॉरिडोरक निर्माणकेँ मंजूरी भेटि गेल अछि। ई परियोजना हाइब्रिड एन्युटी मोड (एचएएम) पर विकसित होयत, जकर कुल पूंजी लागत 3,712.40 करोड़ रुपया होयत।
वर्तमानमे सासाराम, आरा आ पटना केर बीच संपर्क मौजूदा राज्य राजमार्ग (एसएच-2, एसएच-12, एसएच-81 आ एसएच-102) पर निर्भर अछि आ आरा शहर समेत भारी भीड़-भाड़ केर कारण 3-4 घंटा लगैत अछि। मौजूदा ब्राउनफील्ड राजमार्ग केर 10.6 किलोमीटर अपग्रेड संग एक ग्रीनफील्ड कॉरिडोर विकसित कएल जायत, जाहिसँ बढ़ैत भीड़केँ कम कएल जायत आ घना आबादी वला क्षेत्रक आवश्यकता सभ पूरा कएल जायत।
परियोजनाक अलाइनमेंट (संरेखण) NH-19, NH-319, NH-922, NH-131G आ NH-120 सहित प्रमुख परिवहन गलियारासँ एकीकृत अछि, जे औरंगाबाद, कैमूर आ पटना केर निर्बाध कनेक्टिविटी प्रदान करैत अछि। एहिकेँ अतिरिक्त, ई परियोजना 2 हवाई अड्डा (पटनाक जय प्रकाश नारायण अंतर्राष्ट्रीय हवाई अड्डा आ नव निर्मित बिहटा हवाई अड्डा), 4 प्रमुख रेलवे स्टेशन (सासाराम, आरा, दानापुर, पटना) आ 1 अंतर्देशीय जल टर्मिनल (पटना) केर सेहो कनेक्टिविटी प्रदान करत। पटना रिंग रोड धरि सीधा पहुँचकेँ आसान करत, जाहिसँ माल आ यात्रीक तेज आवाजाहीक सुविधा होयत।
प्रोजेक्ट पूरा होयत तँ पटना-आरा-सासाराम कॉरिडोर क्षेत्रीय आर्थिक विकासमे महत्वपूर्ण भूमिका निभाओत, जाहिसँ लखनऊ, पटना, रांची आ वाराणसीकेँ बीच सम्पर्कमे सुधार होयत।
केंद्र सरकार द्वारा जनतब देल गेल कि ई परियोजना सरकारक आत्मनिर्भर भारत केर दृष्टिकोणक अनुरूप अछि, जे बिहारमे रोजगार उत्पन्न करत आ बुनियादी ढांचेके बढ़ाओत आ सामाजिक-आर्थिक विकासके प्रोत्साहित करत। ई परियोजना 48 लाख मानव दिवसक रोजगार उत्पन्न करत आ पटना आ लगपासक विकासशील क्षेत्रमे विकास आ समृद्धिक नवीन मार्ग खोलत।
