पलायन रोको पदयात्राक तहत मंगलक राति कन्हैया कुमार बनगांव पहुँचलाह। बनगांव स्थित दुर्गा मंदिरक प्रांगणमे ओ नुक्कड़ सभाकेँ संबोधित कएलनि। बुधदिन गामके किछु युवा गंगाजलसँ मंदिरकेँ धोलनि। नगर पंचायत बनगांव वार्ड पार्षद प्रतिनिधि अमित चौधरीक अगुआईमे विष्णु, माखन, आनंद, सुरज, सरोज, बादल कहलनि कि काल्हि राति आयल वैऽह कन्हैया कुमार छल जे देशमे विवादित बयान देने छल, ओ सबकेँ याद रहत। एहि कारण हुनका पर देशद्रोहक आरोप सेहो लागल। ओ लोकनि कहलनि कि बनगांवक भगवती स्थानमे जाहि ठाम कन्हैया कुमार भाषण देने छलाह, से गंगाजलसँ शुद्ध कएल गेल अछि। आब ई स्थान पवित्र भऽ गेल अछि।
एही घटनाक बाद राजनीति गर्म भ’ गेल अछि। कन्हैया कुमारक समर्थक एही घटना पर विरोध क’ रहल अछि। जनतब जे जाहि जगहकेँ गंगाजलसँ धोल गेल, ओहिठाम मंगलक राति बनगाँव भगवती स्थान पर स्थानीय लोक आ कांग्रेस कार्यकर्ता सभ पंरपरागत पाग, चादरि आ माला पाहिरा कन्हैया कुमारकेँ स्वागत कएलनि। सभाकेँ संबोधित करैत कांग्रेस नेता कन्हैया सरकारक नीतिसभ पर प्रश्न उठएलनि। जनसभाकेँ संबोधित करैत कन्हैया कुमार बिहार सरकारक 19 वर्षक शासन पर तीक्षण टिप्पणी कएलनि। ओ कहलनि कि एतबा लंबा समयमे बेरोजगारीक समस्या जस केर तस अछि। ओ सरकारसँ पूछलनि कि कतेक युवा सभकेँ नौकरी भेटल ?
कन्हैया कुमार कहलनि जे बिहारक जे छवि गैंग्स ऑफ वासेपुरमे देखाइत अछि से बिहारक असली छवि नहि अछि। बिहारक असली छवि किछु आओर अछि। हमर इतिहास, संस्कृति आ सभ्यता काफी समृद्ध अछि मुदा हमर इतिहास वर्तमान समस्यासँ ढँकल जा रहल अछि।
बनगाँवमे चोरसँ बचबाक लेल सीसीटीवी कैमराक व्यवस्था कएल जा रहल अछि किएक त’ लोक आईएएस, आईपीएस, इंजीनियर, डॉक्टर आ आन पद पर आसीन त’ भ’ गेल छथि मुदा गामसँ पलायन क’ गेल छथि। ओ कुनू पर्व-त्योहार पर गाँव अबैत छथि। आब गाममे बेबसी, लाचारी आ मजबूरी बचल अछि। नीक शिक्षाक खोजमे अपन माटि छोड़य पड़ि रहल अछि।
कन्हैया कहलनि कि रोजगारक अभावसँ बिहारक लाखों युवा दोसर राज्यमे पलायन कय रहल छथि। ओ कहलनि जे सरकार मात्र वादा करैत अछि। शिक्षा आ रोजगारमे सुधार बिना राज्यक विकासक संभव नहिं अछि। ओ सरकारसँ नीति पर पुनर्विचार करबाक आ युवाक लेल नव रोजगारक अवसर बनेबाक मांग कएलनि। कन्हैया लोकसँ अपील कएलनि जे अपन अधिकारक लेल जागरूक बनु। एहेन सरकारकेँ चुनू जे युवाक भविष्यकेँ प्राथमिकता देत।
