केंद्रीय गृह मंत्री अमित शाह रविकेँ असमक कोकराझारमे ऑल बोडो स्टूडेंट यूनियन (एबीएसयू)क ५७म वार्षिक अधिवेशनमे भाग लेलनि। सम्मेलनमे अपन संबोधनमे अमित शाह कहलनि जे कांग्रेस बोडो समझौतापर हस्ताक्षर करबाक लेल हमरासभक मजाक उड़ायलक, मुदा ई समझौता बोडोलैंडमे शान्ति आ विकास अनलक।
केंद्रीय गृह मंत्री ऑल बोडो स्टूडेंट यूनियन अधिवेशनमे अपन संबोधनक दौरान कहलनि कि केंद्र सरकार 35 लाखक आबादी वला बोडोलैंडक विकासक लेल 1500 करोड़ रुपया देलक अछि। शाह बोडो युवासभसँ कहलनि जे आब हुनका २०३६क ओलम्पिकक तैयारी शुरू करबाक चाही, जे अहमदाबादमे आयोजित होयबाक प्रस्ताव अछि। शाह कहलनि जे बोडो समझौताक ८२ प्रतिशत खण्ड लागू कऽ देल गेल अछि आ अगिला दू सालमे १०० प्रतिशत लागू कयल जायत।
जनतब जे जनवरी २०२० मे केन्द्र सरकार, असम सरकार आ बोडो समुदायक बीच बोडो समझौता भेल छल। ओहि समझौताक उद्देश्य आन्तरिक संघर्षकेँ समाप्त करब छल। बोडो जनजाति दशकसँ ब्रह्मपुत्र नदीक कातमे ऊपरी क्षेत्रमे एकटा अलग बोडोलैंड राज्यक निर्माणक माँग करैत आबि रहल अछि। बोडो समुदायक मानब अछि जे आन समुदायक उपस्थिति ओकर पहिचान आ संस्कृतिक लेल खतरा अछि। बोडो समुदाय आ ओकर विभिन्न सङ्गठन अपन माँग पर जोर देबाक लेल कतेको बेर हिंसाक सहारा लेलक अछि। मुदा, जनवरी २०२० मे कयल गेल बोडो समझौता एहि हिंसाकेँ रोकि देलक अछि।
शनिकेँ अमित शाह असममे लचित बरफुकन पुलिस अकादमीक उद्घाटनक क्रममे कांग्रेसक आलोचना सेहो कयलनि। ओ कहलनि जे कांग्रेस असममे शान्ति कायम नहि होबय देलक, मुदा पीएम मोदी एकरा बहाल कयलनि आ पूर्वोत्तरक विकास कयलनि। अमित शाह उल्लेख कयलनि जे पछिला १० सालमे १०,००० सँ बेसी युवा आत्मसमर्पण कऽ मुख्यधारामे शामिल भऽ गेल छथि।
