बिहारक पूर्व मुख्यमंत्री राबड़ी देवी सरकारसँ महिलासभकेँ २५०० रुपया प्रति महिना उपलब्ध करयबाक माँग कयलनि अछि। सोमदिन बिहार विधानसभाक बजट सत्रक कार्यवाही शुरू होयबासँ पहिने विपक्षी विधायक सभ विधानसभा परिसरमे विरोध प्रदर्शन कयलनि। विपक्षी विधायकलोकनि पोस्टर आ तख्ती पकड़ि कहलनि जे हुनका एहि बजटसँ बेसी अपेक्षा नहि अछि।
ओ लोकनि सरकारसँ सवाल कयलनि जे बिहारक महिला आ युवाक लेल की विशेष अछि। की सरकार 200 यूनिट मुफ्त बिजली देत ? एम्हर पूर्व मुख्यमंत्री राबड़ी देवी कहलनि जे सामाजिक सुरक्षाक अन्तर्गत वृद्धावस्था पेंशनकेँ बढ़ाकऽ १५०० रुपया कयल जाय। एकर अतिरिक्त, गैस सिलेंडर, जकर दाम एखन १२०० रुपया अछि, ओकरा घटा कऽ ५०० रुपया प्रति सिलेंडर कऽ देल जेबाक चाही। ओ कहलनि जे सरकारकेँ राज्यक सभ महिलाकेँ हुनक वर्ग वा धर्मक परवाह कएने बिना २५०० रुपया प्रति मास पेंशन देबाक चाही। लोककेँ 200 यूनिट मुफ्त बिजली देल जेबाक चाही। पूर्व मुख्यमंत्री राबड़ी देवी इहो उल्लेख कयलनि जे सरकार बजटमे जनताकेँ भ्रमित करबाक प्रयास नहिं करय।
उल्लेखनीय अछि जे रविदिन राजद नेता तेजस्वी यादव सेहो कहलनि जे ई नीतीश कुमारक अंतिम बजट होयत। ओहिसँ पहिने कृपया बजटमे महिलाक लेल किछु नीक घोषणा करू। भले अहाँ हमर प्लान केर कॉपी करू, कृपया महिलाकेँ हर महीना 2500 रुपया उपलब्ध कराउ। ओ कहलनि जे बजटमे प्रति माह 200 यूनिट बिजली मुफ्त करू, कियैक तँ बिहारक लोक स्मार्ट मीटरसँ परेशान अछि। बिहारक महिला महगीसँ परेशान छथि। 500 रुपयामे गैस सिलेंडर उपलब्ध कराउ। एकर अतिरिक्त, जाति जनगणनाक दौरान ९४ लाख लोकक पहिचान कयल गेल जिनकर आय ६,००० रुपैयासँ कम अछि। कहल गेल छल जे हुनका लोकनिकेँ आर्थिक न्यायक लेल दू लाख रुपया देल जेबाक चाही। ई प्रावधान एहि बजटमे करबाक चाही।
