बचाव अभियान समाप्त, ४६ मजदूर सुरक्षित मुदा ८ गोटेक दुःखद मृत्यु

देहरादून
*

उत्तराखंडक माणामे ग्लेशियर टूटलाक कारण एकटा पैघ हिमस्खलन भेल आ एहि दुखद घटनाक बाद मजदूरसभकेँ बचाबय लेल शुरू कयल गेल बचाव अभियान आब समाप्त भऽ गेल अछि। एहि दुर्घटनामे आठ मजदूरक जान चलि गेल, जखनि कि ४६ मजदूरकेँ सुरक्षित बचा लेल गेल।

एनडीआरएफ, एसडीआरएफ आ सेना सहित २०० सँ बेसी लोक राहत आ बचाव कार्यमे शामिल छलथि। ई ऑपरेशन लगभग ६० घंटा धरि चलल।

जनतब अछि जे मजदूर सभ निर्माण काजमे लागल छलथि तखनि अचानक ऊपरसँ बर्फक पहाड़ खसि पड़ल, जाहिसँ कतेको मजदूर दबि गेलाह। जहिना प्रशासनकेँ घटनाक सूचना भेटल, ओ सभ हरकतमे आबि गेलाह आ बचाव अभियान शुरू भऽ गेल। शुरूमे अवरुद्ध मार्गक कारण राहत कार्यमे कठिनाईक सामना करय पड़ल, मुदा बादमे आधुनिक उपकरणक सहायतासँ अभियानकेँ तेज कयल गेल।

एहि दुर्घटनामे जान गंवाबयवला मजदूरमे दूटा उत्तराखण्डक (एकटा उधम सिंह नगर आ एकटा देहरादून), दूटा हिमाचल प्रदेशक आ चारिटा उत्तर प्रदेशक छल। प्रशासन मृतकक शवकेँ ओकर परिवार धरि पहुँचेबाक व्यवस्था कयलक अछि। उत्तराखंडक आपदा प्रबंधन सचिव विनोद कुमार सुमन कहलनि, “वर्तमानमे सभ लापता मजदूर भेटल अछि। एहि दुर्घटनामे आठ गोटेक मृत्यु भऽ गेल अछि आ ४६ मजदूर सुरक्षित छथि।

रेस्क्यू ऑपरेशनमे ड्रोन, रडार आ भारी मशीनरीक उपयोग कयल गेल जाहिसँ मलबामे फँसल लोकक जल्दीसँ जल्दी पता लगेबाक प्रयास सफल भेल। धामी सरकार मृतकक परिवारकेँ हरसंभव सहायता देबाक आश्वासन देलक अछि। प्रशासन भविष्यमे एहेन घटनाकेँ रोकबाक लेल एहि घटनाक जाञ्चक आदेश देलक अछि।

ई घटना निर्माण स्थलपर सुरक्षा मानकक उपेक्षाकेँ उजागर कयलक अछि। विशेषज्ञसभक मानब छनि जे यदि सुरक्षा नियमक कड़ाईसँ पालन कयल जाय तऽ एहेन दुर्घटनाकेँ रोकल जा सकैत अछि।

मृतकक नाम अछि महेन्द्र पाल (हिमाचल प्रदेश) हरमेश चन्द्र (हिमाचल प्रदेश) जितेन्द्र सिंह (उत्तर प्रदेश) मनजीत यादव (उत्तर प्रदेश) आलोक यादव (उत्तर प्रदेश) अशोक पासवान (उत्तर प्रदेश) अनिल कुमार (उत्तराखंड) अरविन्द कुमार सिंह (उत्तराखंड)।