नीतीशक मंत्रिमंडलमे शामिल सातटा नव मंत्रीक बीच विभागक बंटवारा भेल अछि। एहि संबंधमे कैबिनेट सचिवालय विभाग द्वारा अधिसूचना जारी कऽ देल गेल अछि। एकर अतिरिक्त, कतेको मन्त्रीक विभागमे सेहो परिवर्तन भेल अछि। नव मंत्रीक बीच विभाग बाँटबाक लेल कतेको पुरान मंत्रीक विभाग सेहो बदलल गेल अछि। जे मंत्री पहिने जे विभाग सम्हारैत छलाह आब हुनक किछु विभाग नव मन्त्रीक बीच बाँटि देल गेल अछि।
कैबिनेट सचिवालयक अधिसूचनाक अनुसार बुधदिन मंत्रीक रूपमे शपथ लेनिहार संजय सरावगीकेँ राजस्व आ भूमि सुधार विभागक जिम्मेदारी देल गेल अछि। एम्हर सुनील कुमारकेँ पर्यावरण, वन आ जलवायु परिवर्तन विभागक जिम्मेदारी देल गेल अछि।
राजू कुमार सिंहकेँ पर्यटन विभाग, मोतीलाल प्रसादकेँ कला, संस्कृति आ युवा विभाग एवं विजय कुमार मण्डलकेँ आपदा प्रबन्धनक जिम्मेवारी देल गेल अछि।
कृष्ण कुमार मंटूकेँ सूचना प्रौद्योगिकी विभागक आ जीवेश कुमार मिश्रकेँ शहरी विकास आ आवास विभागक जिम्मेवारी देल गेल अछि।
कैबिनेट सचिवालयक अनुसार, मंत्री विजय कुमार सिन्हाक दायित्वमे संशोधन कयल गेल अछि आ हुनका कृषि आ खान एवं भू-विज्ञानक दायित्व सौंपल गेल अछि। तहिना मंत्री प्रेम कुमारकेँ सहकारिता विभाग, मंगला पांडेयकेँ स्वास्थ्य आ कानून विभाग एवन नीतीश मिश्रकेँ उद्योग विभागक जिम्मेदारी देल गेल अछि।
एकर अतिरिक्त पहिने आवंटित विभागमे संशोधन करैत मंत्री नितिन नबीनकेँ लोक निर्माण विभाग आ मंत्री संतोष कुमार सुमनकेँ लघु संसाधन विभागक प्रभार देल गेल अछि।
एहिसँ पहिने बुधदिन मुख्यमंत्री नीतीश कुमार अपन मंत्रिमण्डलक विस्तार कयने छलाह। एकर अन्तर्गत सातटा नव मंत्रीक नियुक्ति कयल गेल। भाजपा प्रदेश अध्यक्ष दिलीप जायसवाल मंत्री पदसँ इस्तीफा दऽ देने छलाह।
