दिल्ली विधानसभाक दोसर दिन काल्हि (मंगलदिन) शराब नीति पर कैगक रिपोर्ट प्रस्तुत कयल गेल, जाहिमे नव नीतिसँ २ हजार करोड़क नुक्सान आ लाइसेंसिंग प्रक्रियामे अनियमितताक खुलासा भेल।
उपराज्यपाल वीके सक्सेना पर जानिबूझि कऽ रिपोर्ट रोकबाक आरोप लगाओल गेल। सदनमे विपक्षीक हंगामा भेल आ आम आदमी पार्टीक २२ विधायककेँ निलम्बित कऽ देल गेल।
दिल्लीक मुख्यमंत्री रेखा गुप्ता एकरा सदनमे रखलनि, जकर बाद शराब नीतिक मामिलामे आम आदमी पार्टीक नेतासभक लेल परेशानी बढ़ि सकैत अछि।
रिपोर्टमे खुलासा भेल अछि जे नव शराब नीतिसँ दिल्ली सरकारकेँ लगभग २ हजार करोड़क नुकसान भेल। एकर अतिरिक्त, लाइसेंसिंग प्रक्रियामे अनियमितता आ नीतिमे कतेको कमजोरी पाओल गेल।
दिल्लीक उपराज्यपाल वीके सक्सेना कहलनि जे पछिला सरकार जानिबूझि कऽ एहि रिपोर्टकेँ रोकि देने छल। एकरा सदनमे प्रस्तुत नहि कयल गेल, जे संविधानक उल्लंघन छल। विशेषज्ञ पैनल शराब नीतिमे किछु बदलावक सुझाव देने छल, जकरा तत्कालीन उपमुख्यमंत्री मनीष सिसोदिया अनदेखा कऽ देलनि।
कैगक रिपोर्ट भाग-१ पर भाजपा विधायक अरविन्द सिंह लवली कहलनि जे पछिला १० सालमे दिल्लीक संबंधमे कैगक एकटा रिपोर्ट सदनमे प्रस्तुत नहि कयल गेल अछि, जे शर्मक विषय अछि। एहिसँ पहिने आइ उपराज्यपाल वीके सक्सेनाक सदनमे भाषणक क्रममे आम आदमी पार्टीक विधायक लोकनि हंगामा कयलनि। एकरा देखैत विधानसभा अध्यक्ष वीके सक्सेना विपक्षी नेता आतिशी सहित आम आदमी पार्टीक १२ विधायककेँ एक-एक कऽ सदनसँ निलम्बित कऽ देलनि। एहि दौरान उपराज्यपाल कहलनि जे दिल्लीक सड़कमे सुधार होयत। दिल्लीमे राजस्व बढ़ेबाक प्रयास कयल जायत। रोजगारक बढ़ावा देबय वाला योजना लागू कएल जाएत। हमर सरकार सभ कर्मचारीक मनोबल बढ़ेबाक लेल काज करत।
दिल्ली विधानसभामे विपक्षक नेता आतिशी भाजपा सरकार पर महिला सम्मान योजनाक संबंधमे अपन वादासँ पाछू हटय केर आरोप लगौलनि।
एहिसँ पहिने सदनमे विपक्षी दल आम आदमी पार्टी (आप) मुख्यमंत्रीक घरमे भगत सिंह आ डॉ. अम्बेडकरक चित्रकेँ लऽ कऽ हंगामा कयलक। जखनि एलजी वीके सक्सेना भाषण दऽ रहल छलाह तखनि आम आदमी पार्टीक विधायक मोदी-मोदीक नारा लगा रहल छल।
भाजपाक जीतक बादसँ आम आदमी पार्टीक विधायकसभक एना करत आ एहेन घटना होयबाक आशंका छल। अंततः ई घटना मंगलकेँ भेल। आम आदमी पार्टीक २२ विधायककेँ सदनसँ निष्कासित कऽ देल गेल अछि।
दिल्लीक नव मुख्यमंत्री रेखा गुप्ता सोमदिन एकर अनुमान लगओने छलीह। रेखा गुप्ता सोमदिन कहने छलीह जे आम आदमी पार्टीक विधायकसभकेँ आब सदनमे उचित आचरण बनाकऽ रखबाक चाही।
दिल्ली विधानसभामे आम आदमी पार्टीक कार्यकालमे कयल गेल काजक संबंधमे कैगक रिपोर्ट प्रस्तुत होयसँ पहिने नेता प्रतिपक्ष आतिशीक नेतृत्वमे आम आदमी पार्टीक विधायकलोकनि हंगामा शुरू कऽ देलनि। सोमदिन सेहो आम आदमी पार्टीक विधायक लोकनि द्वारा एहने हंगामा कयल गेल छल। ओना सोमदिन विधानसभा अध्यक्ष विजेंद्र गुप्ता संयम देखौलनि।
जनतब अछि जे आम आदमी पार्टीक सभ विधायक मुख्यमंत्री कार्यालयसँ भगत सिंह आ बी.आर. अम्बेडकरक फोटो हटयबाक विरोधमे प्रदर्शन कऽ रहल छलाह। ठीक सोमदिन जकाँ मंगलदिन विधानसभा अध्यक्ष विजेंद्र गुप्ता बेर-बेर आतिशीकेँ अपन स्थान पर जयबाक लेल कहलनि। मुदा, एकर बादो आतिशी आ आम आदमी पार्टीक सभ विधायक हंगामा नहि रोकलनि। ओकर बाद अध्यक्षकेँ आदेश देबय पड़ल।
