जदयू नेता राजीव रंजन प्रसाद कहैत छथि जे नीतीश कुमार करिश्माई मुख्यमंत्री छथि। हम फेर कहियो इंडिया गठबंधनमे नहि जाएब। नीतीश कुमार सेहो इ बात कहि चुकल छथि।
महाराष्ट्रक पूर्व मुख्यमंत्री उद्धव ठाकरे’क बेटा शिवसेना नेता आदित्य ठाकरे कहलनि जे हमरा संग महाराष्ट्रमे जे भेल ओ भविष्यमे नीतीश कुमारक संग भऽ सकैत अछि। आदित्य ठाकरे संकेत दऽ रहल छथि जे शिवसेना जकाँ भाजपा जेडीयू केर सेहो तोड़ि सकैत अछि। ई चुनावक साल अछि। बिहारमे भाजपा अपन मुख्यमंत्री बना सकैत अछि।
जदयूक राष्ट्रीय प्रवक्ता राजीव रंजन प्रसाद बृहस्पति (13 फरवरी)क एहि पर प्रतिक्रिया देलनि। राजीव रंजन कहलनि जे सब किछु खतम भेलाक बाद आदित्य ठाकरे किएक पछताइथ छथि ? इंडिया गठबंधनक अस्तित्व पूरा देशमे खतरामे अछि। जेडीयू कतेको सालसँ एनडीए केर संग अछि आ भाजपाक संग गठबन्धन कऽ कतेको चुनाव लड़ल गेल आ जीतल गेल। नीतीश कुमार एकटा करिश्माई मुख्यमंत्री छथि। एहि साल नीतीशक नेतृत्वमे एनडीए विधानसभा चुनावमे 225 सीट जीतत। हम फेर कहियो इंडिया गठबंधनमे शामिल नहि होयब। नीतीश कुमार सेहो इ बात कहने छथि।
लालू यादवक एकटा बयान पर प्रतिक्रिया दैत राजीव रंजन कहलनि कि भगवान हुनका दीर्घायु करथि जाहिसँ ओ बिहारमे एनडीए सरकार बेर-बेर देखि सकथि। बिहारमे आब तेजस्वीक लेल कोनो जगह नहि अछि। लालूक लोकसभा चुनाव आ विधानसभा उपचुनावक परिणाम देखबाक चाही। राजदक परिणाम 2010 केर तुलनामे खराब होएत।
जनतब अछि जे लालू यादव बयान देने छलथि जे जाबति धरि ओ जीवित छथि बिहारमे भाजपाक सरकार नहि बनि सकैत अछि।
दोसर दिसि आदित्य ठाकरे द्वारा सीएम नीतीश कुमारक बारेमे देल गेल बयानक संबंधमे राजद प्रवक्ता एजाज अहमद कहलनि ‘आदित्य ठाकरे एकदम सही छथि’। हुनकर चिंता वैध अछि। चुनाव जीतलाक बाद भाजपा शिंदेकेँ महाराष्ट्रमे मुख्यमंत्री नहि बनओलक। नीतीश कुमार’क संग सेहो एहिना होएत। भाजपा अपन सहयोगी दलकेँ खतम कए दैत अछि। जेडीयूक भीतर बहुत रास लोक सेहो छथि जे भाजपाक इशारापर जेडीयूकेँ खतम करबाक काज कऽ रहल छथि।
