अधिकारीलोकनि कहलनि जे दक्षिणी कैलिफोर्नियाक लॉस एंजिल्स क्षेत्रमे जंगलमे लागल भीषण आगिमे कमसँ कम २७ लोकक मृत्यु भऽ गेल अछि आ १२,३०० सँ बेसी संरचना नष्ट भऽ गेल अछि। स्थानीय अधिकारी लोकनि एकर पुष्टि कयलनि अछि।
समाचार एजेंसीक रिपोर्टक अनुसार, लॉस एंजिल्समे दूटा पैघ जंगलमे लागल आगि पर काबू पाबै लेल अग्निशमन दल बृहस्पतिकेँ काज जारी रखने छल, कियैकि एहि क्षेत्रमे हवा धीमा भऽ गेल अछि।
पैलिसेड्स फायर लॉस एंजिल्स क्षेत्रक सबसँ पैघ सक्रिय जंगलक आगिमेसँ एक अछि, जे एखन धरि २३,७१३ एकड़ (९५.९६ वर्ग किमी) केँ घेरि लेने अछि। ७ जनवरीकेँ लागल आगि केर २२ प्रतिशत नियंत्रित कयल गेल अछि, जे एक दिन पहिने केर १७ प्रतिशतसँ बेसी अछि।
कैलिफोर्निया वानिकी आ अग्नि संरक्षण विभाग (कैल फायर) बृहस्पतिकेँ एकटा अपडेटमे कहलक, “मौसमक स्थिति सामान्य भऽ गेल अछि, आ आगि वर्तमान परिधिक भीतर रहबाक आशा अछि। कोनो अतिरिक्त वृद्धि प्रत्याशित नहि अछि।”
कैल फायर कहलखिन, “चालक दल अग्नि रेखाक स्थापना आ मरम्मत, संभावित अग्नि स्थलक खोज आ बुझायब, आ जोखिम वला क्षेत्रमे क्षतिकेँ सीमित करबाक लेल नियंत्रणक रेखा तैयार करब जारी रखने छथि।”
एकटा आओर पैघ आ सक्रिय आगि ईटन फायर अल्टाडेना आ पासाडेनाक लग १४,११७ एकड़ (५७.१ वर्ग किमी) केर जरा देलक अछि। अग्निशमन स्तर एक दिन पहिने ४५ प्रतिशतसँ बढ़ि कऽ ५५ प्रतिशत भऽ गेल अछि।
कैल फायरक अनुसार, राति आ भोरे-भोर मौसमक आसान स्थितिसँ आगिक गतिविधि कम भऽ गेल, जाहिसँ अग्निशामककेँ नीक प्रगति करबामे सहायता भेटल।
एजेंसी कहलक जे सोमदिन हवाक वापसीक कारण, दक्षिणी कैलिफोर्नियाक किछु हिस्सामे आगिक गम्भीर स्थिति व्यापक रूपसँ बनल रहल।
यूएस नेशनल वेदर सर्विस कहलक, “हम आशा कऽ रहल छी जे एहि सप्ताह आगिक चिंतासँ राहत भेटत।” ”
यूएस नेशनल वेदर सर्विस एहि सप्ताहक आरम्भमे “विशेष रूपसँ खतरनाक स्थिति”क चेतावनी जारी कयलक अछि।
एजेंसी कहलक, “अगिला सप्ताह चिन्ताक कारण अछि। यद्यपि हमरासभकेँ विश्वास अछि जे पछिला सप्ताह सन घटना नहि होयत, मुदा आगि लगलाक स्थितिमे खतरनाक मौसमक स्थिति बनल रहबाक सम्भावना अछि।”
