दरभंगाखक सिंहवाड़ा प्रखंड मुख्यालयक ट्राइसन भवनमे आयोजित पंचायत समितिक विशेष बैसारमे प्रखंड प्रमुख पुष्पा झाक खिलाफ अविश्वास प्रस्ताव पास होइतहि प्रमुखक कुर्सी छीना गेल। सदनमे पहुंचल बीसो पंचायत समिति सदस्य प्रमुखक खिलाफ लगाओल गेल अविश्वास प्रस्तावक पक्षमे मतदान कयलन्हि । मतक गिनतीमे बीसक बीसो मत सही पाओल गेलाक संगहि प्रखंड प्रमुखक कुर्सी चलि गेल।
डीसीएलआर संजीत कुमारक देखरेखमे भेल पंचायत समितिक बैसारमे निर्धारित समयसँ देर धरि इंतजार कयलाक बाद 35 सदस्यीय सदनमे मात्र बीसटा सदस्य सदन पहुँचलाह । उप प्रमुख साजिद मुजफ्फर बबलू प्रमुखक खिलाफ लगाओल गेल अविश्वास प्रस्तावकेँ पढ़लन्हि । ओकरा बाद बीडीओ अमरेंद्र पंडितक देखरेखमे भेल मतदानमे उपस्थित सभ सदस्य अविश्वास प्रस्तावक पक्षमे मतदान कयलन्हि।
विदित अछि जे प्रखंड प्रमुख पुष्पा झाक खिलाफ 17 पंचायत समिति सदस्य 28 दिसम्बरकेँ बीडीओ अमरेंद्र पंडितकेँ अविश्वास प्रस्तावसँ संबंधित आवेदन देने छलाह जाहिमे प्रमुखक खिलाफ मनमानी करबाक आरोप लगाओल गेल छल। हाई कोर्टक आदेशक आलोकमे देल गेल अविश्वास प्रस्ताव पर हस्ताक्षर करयवला 35 मे सँ 17 पंचायत समिति सदस्य , उप प्रमुख साजिद मुजफ्फर , पंसस मनोज सिंह , कन्हैया मिश्र , मो० अरशिद , विद्यापति झा , मो० इम्तेयाज अंसारी , हसरत प्रवीण , जरीना खातुन, लालबाबू पासवान, सीमा देवी, नगीना देवी, राजा पासवान, नजमा खातून , कुसुम देवी , उषा देवी , बिलकिस , श्याम कुमार आवेदन देने छलाह जाहिमे पंसस द्वारा प्रखण्ड प्रमुखक पद पर निर्वाचित भेलाक बाद सं अपन कर्त्तव्यक निर्वहनमे उदासीन रहबाक आरोपक संग-संग नियमानुसार पंचायत समितिक बैसार आयोजित नहि करबाक , जातियता आ राजनितिक भेदभावक माहौल उत्पन्न करबाक, अनुसूचित जाति , पिछड़ल जाति आ अल्पसंख्यक समुदाय सबहक हित केर अनदेखी करबाक संगहि क्षेत्रक चौमुखी विकास नहि करबाक आरोप लगाओल गेल छल।
ज्ञातव्य अछि जे प्रखंड प्रमुख पुष्पा झाक खिलाफ अविश्वास प्रस्ताव पर 6 जनवरी 2024 केँ प्रस्तावित पंचायत समितिक बैसार कोरम केर आभावमे खारिज भऽ गेल छल । आजूक प्रखंड प्रमुख पर लगाओल गेल अविश्वास प्रस्तावक बैसारक दौरान सुरक्षा आ विधि व्यवस्थाक लेल बांस बल्लासँ बैरिकेड्स कयल गेल छल। दंडाधिकारी राम नाथ राम , पुलिस अधिकारी कमलेश मिश्र आ दिलीप कुमारक संग सशस्त्र बलकेँ तैनात कयल गेल छल।
