विदेश मंत्री एस जयशंकर बृहस्पतिकेँ कहलनि जे भारतक प्रवासी समुदायक महत्व प्रत्येक वर्ष बढ़ि रहल अछि कियैक तँ भारत वैश्विक कार्यबलक निर्माणक दिशामे काज कऽ रहल अछि।
जयशंकर प्रवासी भारतीय दिवस सम्मेलनमे प्रवासी भारतीय प्रवासीकेँ सम्बोधित कऽ रहल छलाह। ओ बल दैत कहलनि, “जँ विदेशमे कहियो कोनो परेशानी होइत अछि तऽ ओ विश्वास राखि सकैत छथि जे नरेंद्र मोदी सरकार हुनका संग अछि। हमरा अपन प्रवासी भारतीय केर उपलब्धि पर गर्व अछि।”
ओ कहलनि, “वैश्वीकरणक युगमे प्रवासी समुदायक महत्व प्रत्येक बीतैत सालक संग बढ़ि रहल अछि, चाहे ओ प्रौद्योगिकी होय, सर्वोत्तम कार्यप्रणाली होय वा संसाधन, चाहे् पर्यटन होय, व्यापार होय वा निवेश, दुनू पक्षक प्रयास आवश्यक अछि कियैक तँ हम वैश्विक श्रमबल बनेबाक प्रयास कय रहल छी।”
ओ कहलनि जे मोदी सरकारक जन-केन्द्रित परिवर्तनसँ प्रवासी भारतीयकेँ लाभ भऽ रहल अछि। ई व्यवसाय सुमगताकेँ बढ़ावा दऽ सकैत अछि, जीवनक सुगमतामे सुधार कऽ सकैत अछि, कनेक्टिविटी आ यात्राकेँ सुगम बना सकैत अछि। प्रवासी भारतीयक हित सुनिश्चित करबाक लेल डिजिटल प्रौद्योगिकीक उपयोग सेहो स्पष्ट अछि।
ओ कहलनि, “पछिला दशकमे, हम पासपोर्ट जारी आ नवीकरणक सङ्ग-सङ्ग सत्यापन प्रक्रियाक सरलीकरण देखलहुँ अछि। वाणिज्य दूतावास सेवामे सुधार भेल अछि, कल्याणकारी उपाय बढ़ल अछि आ शिकायत निवारण मंच लागू भेल अछि। दुनिया भरिमे दूतावास आ वाणिज्य दूतावास बेसी जिम्मेदार भऽ गेल अछि। कठिन समयमे अहाँ विश्वास कऽ सकैत अछि जे मोदी सरकार अहाँक सङ्ग अछि।”
जयशंकर ओडिशाक सांस्कृतिक आ ऐतिहासिक धरोहर पर प्रकाश देलनि। ओ इहो कहलनि जे ओडिशाक प्रभाव विदेश नीति आ एक्ट ईस्ट नीतिमे सेहो देखल जाइत अछि। ओ प्रवासी भारतीयसभसँ भारतक गौरवशाली इतिहास, परम्परा आ पहिचानकेँ मजबूत करबाक आह्वान कयलनि।
