एमएलसी चुनावमे भाजपाक चारि प्रत्याशीक नामक घोषणा

पटना । समदिया

बिहार विधान परिषदक 8 सीट पर होबय जा रहल चुनाव लेल भारतीय जनता पार्टी (भाजपा) अपन चारि प्रत्याशीक नामक घोषणा कऽ देलक अछि। पार्टी पटना शिक्षक, कोसी स्नातक, दरभंगा स्नातक आ तिरहुत शिक्षक निर्वाचन क्षेत्रसँ अपन उम्मीदवार उतारलक अछि।

भाजपाक प्रत्याशी

पटना शिक्षक निर्वाचन क्षेत्र – नवल किशोर यादव

कोसी स्नातक निर्वाचन क्षेत्र – डॉ. नरेंद्र कुमार (एनके यादव)

दरभंगा स्नातक निर्वाचन क्षेत्र – सर्वेश कुमार

तिरहुत शिक्षक निर्वाचन क्षेत्र – नरेंद्र प्रसाद सिंह

पटना शिक्षक सीटसँ नवल किशोर यादव लगातार पाँच बेर चुनाव जीत चुकल छथि आ आब छठम बेर मैदानमे छथि। ओ करीब 30 वर्षसँ विधान पार्षद छथि।

कोसी स्नातक सीटसँ भाजपा वर्तमान विधान पार्षद डॉ. नरेंद्र कुमार उर्फ एनके यादव पर फेर भरोसा कयलक अछि। ओ एहि सीटसँ लगातार दू बेर निर्वाचित भऽ चुकल छथि।

दरभंगा स्नातक निर्वाचन क्षेत्रसँ सर्वेश कुमारकेँ प्रत्याशी बनाओल गेल अछि। ओ वर्तमानमे निर्दलीय विधान पार्षद छथि। 2020 मे भाजपासँ टिकट नहि भेटलाक बाद ओ निर्दलीय चुनाव लड़ि कऽ विजयी भेल छलाह। एहि बेर भाजपा हुनका आधिकारिक प्रत्याशी बनौलक अछि।

तिरहुत शिक्षक सीटसँ नरेंद्र प्रसाद सिंहकेँ उम्मीदवार बनाओल गेल अछि। ओ 2008 मे एहि सीटसँ विधान परिषद सदस्य निर्वाचित भेल छलाह आ पिछला चुनावमे भाजपा टिकट पर सेहो मैदानमे उतरल छलाह।

जेडीयू सेहो चारि सीट पर उतारलक प्रत्याशी

एनडीएमे सीट बँटवाराक अनुसार भाजपा आ जेडीयूकेँ चारि-चारि सीट भेटल अछि। जेडीयू पटना स्नातकसँ नीरज कुमार, तिरहुत स्नातकसँ अभिषेक झा, दरभंगा शिक्षकसँ घनश्याम राय आ सारण शिक्षकसँ आनंद पुष्करकेँ प्रत्याशी बनौने अछि।

23 अक्टूबरकेँ मतदान

विधान परिषदक 8 सीट लेल नामांकन प्रक्रिया 29 सितंबरसँ शुरू भऽ गेल अछि। 6 अक्टूबर धरि नामांकन दाखिल कयल जा सकैत अछि। 7 अक्टूबरकेँ नामांकनक जाँच आ 9 अक्टूबरकेँ नाम वापसीक अंतिम तिथि अछि। 23 अक्टूबरकेँ मतदान आ 27 अक्टूबरकेँ मतगणना होएत।

जाहि 8 सीट पर चुनाव होएत, ताहिमे पटना शिक्षक, पटना स्नातक, कोसी स्नातक, दरभंगा स्नातक, दरभंगा शिक्षक, तिरहुत स्नातक, तिरहुत शिक्षक आ सारण शिक्षक निर्वाचन क्षेत्र शामिल अछि।