डोनाल्ड ट्रम्प २० जनवरीकेँ अमेरिकाक नव राष्ट्रपति बनताह, मुदा राष्ट्रपति जो बाइडेनक विरुद्ध हुनकर रुख बनल अछि। आब ओ राष्ट्रपति बाइडेन पर सत्ता हस्तांतरणकेँ कठिन बनेबाक आरोप लगओलनि अछि।
नवनिर्वाचित राष्ट्रपति हालक दिनमे जलवायु आ अन्य शासनक मुद्दा पर बाइडेन प्रशासनक कार्यकारी आदेशक उदाहरण देलनि।
ट्रम्प ट्रुथ सोशल पर एकटा पोस्टमे कहलनि, “बाइडेन एहि बदलाव केर यथासंभव कठिन बनयबाक लेल अपन सामर्थ्यसँ सब किछु कऽ रहल छथि। एहिमे कानूनी कारवाईसँ लऽ कऽ ग्रीन न्यू स्कैम आ पैसा बर्बाद करयवला महंग आ हास्यास्पद कार्यकारी आदेश शामिल अछि।”
नवनिर्वाचित राष्ट्रपति कहलनि , डरू नहिं, ई सब ‘आदेश’ जल्दिये समाप्त भऽ जायत आ हम सामान्य समझ आ ताकतवाला राष्ट्रपति बनि जाएब।
बाइडेनक संग ट्रम्प कनाडाक प्रधानमन्त्री जस्टिन ट्रूडो पर सेहो बहुत आक्रामक रहल छथि। जखन कनाडाक प्रधानमन्त्री अपन त्यागपत्रक घोषणा कयलनि तखन ओ एक बेर फेर कनाडाकेँ अमेरिकामे विलय करबाक प्रस्ताव देलनि।
कनाडाक प्रधानमन्त्री जस्टिन ट्रूडो लिबरल पार्टीक नेताक पदसँ इस्तीफा दऽ देलनि। मुदा, लिबरल पार्टीक नव नेताक चुनाव होयबा धरि ओ प्रधानमन्त्री बनल रहताह।
ट्रूडोक घोषणाक किछु घंटाक बाद ट्रम्प अपन प्रस्ताव दोहरौलनि, “कनाडामे बहुत रास लोक ५१म राज्यक हिस्सा बनब पसंद करत। संयुक्त राज्य अमेरिका आब भारी व्यापार घाटा आ सब्सिडी वहन नहि कऽ सकैत अछि जकर कनाडाकेँ बनल रहबाक आवश्यकता अछि। जस्टिन ट्रूडो इ जनैत छलाह आ इस्तीफा दऽ देलनि।”
ट्रम्प कहलनि कि जँ कनाडा अमेरिकामे शामिल भऽ जायत तऽ कोनो शुल्क नहि लागत, शुल्क बहुत कम भऽ जायत, आ ई रूसी आ चीनी जहाजक खतरासँ पूर्ण रूपसँ सुरक्षित होयत जे ओकरा घेरने रहैत अछि। संग आबि ईकतेक महान राष्ट्र होएत।
ट्रम्प अपन चुनावी जीतक बादसँ ट्रूडो पर आक्रामक रहल छथि। ओ पहिने महान राज्य कनाडाक गवर्नरक रूपमे हुनकर मजाक उड़ा चुकल छथि।
नवनिर्वाचित राष्ट्रपति इहो घोषणा कयलनि अछि जे ओ जनवरीमे पदभार ग्रहण करबाक पहिल दिन आदेशपर हस्ताक्षर करताह, जाहिमे मेक्सिको आ कनाडासँ आबयवला सभ वस्तुपर २५ प्रतिशत शुल्क लागू कयल जायत। ई ताबत धरि लागू रहत जाबत धरि ओ अपन देशसँ संयुक्त राज्य अमेरिकामे अवैध आप्रवासी आ मादक पदार्थ, विशेष रूपसँ फेंटानाइलक प्रवाहकेँ रोकि नहि दैत अछि।
