विगत 5 जनवरी 2025 (रविदिन) मीरा रोड स्थित ब्लूमून सभागारमे, मैथिल विकास प्रतिष्ठान द्वारा छठम वार्षिकोत्सव समारोहक सफल आयोजन कएल गेल। ओना त’ संस्था द्वारा एकटा निश्चित समयांतराल पर समाज कल्याणसँ सम्बंधित कार्यक्रम होइते रहैत अछि, मुदा संस्थाक वार्षिकोत्सव समारोह, समाजक समक्ष अप्पन क्रिया कलाप आ दिशा – दृष्टी प्रस्तुत करबाक माध्यम सिद्ध होइत अछि त’ एहि कार्यक्रमकेँ ल’ संस्थाक तमाम सदस्य आ पदाधिकारी उत्साहित छलथि। मीरा रोड स्थित ब्लूमून क्लबमे आयोजित एहि कार्यक्रमक माध्यमे, मैथिल विकास प्रतिष्ठान द्वारा, मैथिल संस्कृतिक संरक्षण एवं संवर्धन संगहि मैथिल समाजमे एकताकेँ प्रोत्साहित करबाक कएल गेल।
एहि वार्षिकोत्सव कार्यक्रममे मुख्य अतिथिक रूपमे देवेशचंद्र ठाकुर (सांसद – सीतामढ़ी) विशेष रूपसँ उपस्थित छलथि। कार्यक्रमक दौरान सांसद ठाकुरकेँ श्रेष्ठ मैथिल सम्मानसँ सम्मानित कएल गेल। समारोहक दौरान, लोक सांस्कृतिक कार्यक्रमक आयोजन सेहो कएल गेल छल, जाहिमे स्थानीय मैथिल गायक मनोरंजन झा आ हुनक टीम द्वारा रंग बिरंगक गीतनादक प्रस्तुति भेल। एहि क्रममे अनेको स्थानीय मैथिल नवोदित कलाकार अप्पन सुन्नर प्रस्तुतिसँ दर्शक आ श्रोता लोकनिक मनोरंजन सेहो कएलनि, सभागरमे मिथिला पेंटिंग आ वस्त्रक प्रदर्शनी सेहो लगाओल गेल छल जे, मिथिलाक समृद्ध परंपरा आ कलाक प्रचार प्रसार लेल निश्चित रूपसँ उपयोगी सिद्ध भेल।
एहि कार्यक्रमक सफलताक लेल स्थानीय मैथिलक संग – संग प्रतिष्ठानक संयोजक डॉ. मोहन झा, अध्यक्ष आमोद झा, सचिव पंडित गौरीकांत झा, संगहि संस्थाक तमाम पदाधिकारी जाहिमे निलेश झा, वीरेंद्र झा, प्रमिल झा, श्रवण झा संगहि तमाम सदस्यक महत्वपूर्ण भूमिका देखल गेल।
