राजद सुप्रीमो लालू यादव मुख्यमंत्री नीतीश कुमारकेँ ऑफर देलनि अछि। ओ कहलनि, “नीतीश कुमारक लेल हमर दरवाजा खुजल अछि। हम हुनका माफ कए देब। हुनका आबए दियौ, हम सभ मिलि कए काज करब।” लालू प्रसाद यादव बिहारक राजनीतिक पारा चढ़ा देलनि अछि।
राष्ट्रीय जनता दल (राजद) सुप्रीमो लालू प्रसाद यादव बिहारक राजनीतिक पारा बढ़ा देने छथि। ओ बिहारक मुख्यमंत्री नीतीश कुमारकेँ प्रस्ताव दैत कहलनि अछि जे हुनका लेल हमर दरवाजा खुजल अछि। जँ ओ अबैत छथि तखनि हम हुनका संग किएक नहिं लेब ? नीतीश कुमारकेँ एक संग आबए केर चाही, मिलजुलिकेँ काज करय केर चाही। लालू कहलनि जे नीतीशे कुमार हरदम भागैत छथि, हम माफ कऽ देब।
एम्हर भाजपा कहलक जे लालू यादवकेँ आब सपना नहि देखबाक चाही। नीतीश आब लालू-तेजस्वीकेँ माफ नहि करय जा रहल छथि। लालूसँ पहिने राजद विधायक भाई वीरेन्द्र सेहो कहने छलाह जे जँ जेडीयू साम्प्रदायिक ताकतक प्रतिनिधित्व करय वाला भारतीय जनता पार्टीसँ संबंध तोड़बाक इच्छा देखाबैत अछि तऽ ओ एक बेर फेर मुख्यमंत्री नीतीश कुमारक संग गठबंधन करय लेल तैयार छथि। कहल जाइत अछि जे भाई वीरेन्द्र लालू यादवक निकट छलाह। ई पूछला पर कि जदयू आ भाजपाक बीच कथित तनावक मद्देनजर खेल होबय केर संभावना अछि की, राजद विधायक कहलनि, “बिहारमे बहुत रास राजनीतिक खेल देखल गेल अछि आ भविष्यमे एहेन आओर खेल खेलल जा सकैत अछि।”
तेजस्वी यादव बुधदिन दावा कयने छलाह जे नीतीश कुमारक नेतृत्ववला सरकार नव वर्षमे छोड़बाक लेल तैयार अछि। ओ कहलनि जे नव वर्षमे एकटा नव फसल आ नव सरकार देखल जायत जे लोकक शिक्षा, कमाई, दवाई, सुनवाई आ कारवाईक लेल सरकारक आवश्यकताक प्रति संवेदनशील होयत।
ओ कहने छलथि, “नव सालमे हमर काका नीतीश कुमारकें सत्तासँ बाहर कऽ देल जायत। ओ २० सालसँ सत्तामे छथि। जँ एके फसिल एतेक दिन धरि बोयल जायत तँ माटि बर्बाद भऽ जाइत अछि। तेँ नीतीश जी आ एनडीए केर जाएकेँ समय आबि गेल अछि।”
