बिहारमे विपक्षक नेता तेजस्वी यादव शनिकेँ मुख्यमंत्री नीतीश कुमार पर भयंकर राजनीतिक हमला कयलनि। ओ कोनो प्रकारक राजनीतिक उलटफेरसँ इन्कार करैत एहेन चर्चाकेँ “बकवास” करार दैत कहलनि जे एहि बात सभमे कोनो दम नहि अछि। ओ कहलनि जे नीतीश कुमार होशमे नहि छथि आ बिहार हुनकासँ चलि नहिं रहल अछि। पटनामे संवाददाता सभसँ बातचीत करैत पूर्व उपमुख्यमंत्री कहलनि जे बिहारमे कोनो सरकार नहि अछि। जे अछि तकरा होशे नहिं छैक।
ओ कहलनि, “आब एहि पर चर्चा होयबाक चाही जे बिहारमे सरकार अछि वा नहि। जँ अछि तऽ मुख्यमंत्रीकेँ नेतृत्व करबाक चाही। मुदा, आब ओ निर्णय लेबामे सक्षम नहिं छथि। जँ ओ कोनो विषय पर निर्णय नहि लऽ पाबि रहल छथि तखन आखिर सरकार के चला रहल अछि ?”
ओ कहलनि, “किछु सेवानिवृत्त अधिकारी आ दूटा नेता दिल्लीमे छथि आ दूटा नेता पटनामे छथि, ओ अपन लाभक लेल निर्णय लऽ रहल छथि। हुनका बिहारसँ कोनो लेना-देना नहि अछि। भाजपाक संग तालमेल अछि। हुनका अपन देखय केर अछि।”
तेजस्वी यादव कहलनि जे मुख्यमंत्री यात्रा पर गेल छथि, मुदा कोनो संवाद नहि अछि। कोनो पत्रक उत्तर सेहो नहि दए रहल छथि। दिल्लीक पूर्व मुख्यमंत्री अरविन्द केजरीवालक पत्रक जवाब सेहो संजय झा दऽ रहल छथि।
ओ आरोप लगओलनि जे नीतीश कुमार आब होशमे नहिं छथि। हुनकर चेहरा आगू राखि सरकार चलाओल जा रहल अछि। ई वास्तविकता अछि।
बीपीएससी अभ्यर्थी सभक आन्दोलन पर ओ कहलनि जे जँ पेपर लीक भेल अछि तखनि परीक्षा रद्द कऽ देल जाय। जँ हम एकटा केंद्रक परीक्षा रद्द करैत छी तखनि दोसर केंद्रक परीक्षा किएक रद्द नहि कयल जाय ? एक साल भऽ गेल, एकटा युवककेँ नोकरी नहि भेटल। बिहारमे प्रशासनिक अराजकता अछि।
