अपराध अरुणाचल प्रदेश पुलिस 100 करोड़क जीएसटी हेरा फेरी मामिलामे दरभंगासँ दूटा सीएकेँ बनेलक बंदी December 29, 2024 Maithil Punarjagran Prakash दरभंगा समदिया * अरुणाचल प्रदेश पुलिस दरभंगा पुलिसक सहयोगसँ रैयाम थाना क्षेत्रक वनसारा गाममे १०० करोड़ टाकाक जी.एस.टी.क हेरा फेरीक मामलामे चार्टर्ड अकाउंटेंट विपिन झा आ आशुतोष झाकेँ गिरफ्तार कयलक अछि। ई दुनू अरुणाचल प्रदेशमे चार्टर्ड अकाउंटेंटक रूपमे काज करैत अछि। अरुणाचल प्रदेश पुलिस कहलक जे दुनू पर अपन ग्राहकक जीएसटी रिटर्न दाखिल करबामे १०० करोड़ टाकासँ बेसीक गबन करबाक आरोप अछि। एहि मामिलामे अरुणाचल प्रदेश पुलिस तकनीकी निगरानीक मदतिसँ दरभंगा जिलाक रैयाम थानाक पुलिसक सहायतासँ दुनूकेँ ओकर वनसारा गामसँ बन्दी बनेलक। गिरफ्तारीक बाद अरुणाचल पुलिस दुनू अभियुक्तकेँ अपन सङ्ग लऽ जयबाक कानूनी प्रक्रियामे लागल अछि। अरुणाचल प्रदेश पुलिस तकनीकी निगरानीक माध्यमसँ दुनू अभियुक्तक पता लगा लेलक। तकर बाद, अरुणाचल प्रदेश पुलिस आ दरभंगा पुलिसक एकटा संयुक्त टीम वनसारा गाममे छापा मारलक जतय दुनूकेँ बन्दी बनाओल गेल। दुनू आरोपीक गिरफ्तारीक बाद अरुणाचल प्रदेश पुलिस सङ्ग लऽ जेबाक कानूनी प्रक्रिया पूरा कऽ रहल छल। पुलिस कहलक जे दुनू आरोपी अरुणाचल प्रदेशमे चार्टर्ड अकाउंटेंटक रूपमे काज करैत छल आ अपन ग्राहकक जी.एस.टी. रिटर्नमे हेराफेरी करैत छल। Spread the love
