प्रधानमंत्री नरेन्द्र मोदी हरियाणाक पूर्व मुख्यमंत्री ओम प्रकाश चौटालाक निधनपर दुख व्यक्त कयलनि अछि। प्रधानमंत्री मोदी सोशल मीडिया प्लेटफॉर्म एक्स पर ओम प्रकाश चौटालाक संग एकटा पुरान तस्वीर सेहो साझा कयलनि। शुक्रदिन पीएम मोदी एक्स पर लिखलनि, ‘हरियाणाक पूर्व मुख्यमंत्री ओम प्रकाश चौटाला जीक निधनसँ हम बहुत दुखी छी। ओ कतेको वर्ष धरि राज्यक राजनीतिमे सक्रिय रहलाह आ चौधरी देवीलाल जीक प्रयासकेँ बढ़ावा देबाक लेल लगातार काज कयलनि। शोकक एहि समयमे हुनक परिवार आ समर्थकक प्रति हमर हार्दिक संवेदना अछि।
रक्षामंत्री राजनाथ सिंह सेहो भारतीय राष्ट्रीय लोक दल (इनेलो) प्रमुख ओम प्रकाश चौटालाक निधनपर दुख व्यक्त करैत लिखलनि, ‘हरियाणाक पूर्व मुख्यमंत्री ओम प्रकाश चौटाला जीक निधनसँ हम बहुत दुखी छी। हुनकर लम्बा राजनीतिक जीवन लोकक सेवामे समर्पित छल। ओ सदैव किसानक कल्याणक लेल आवाज उठौलनि। दुखक एहि घड़ीमे भगवान हुनक शोकग्रस्त परिवार आ समर्थककेँ धैर्य आ शक्ति प्रदान करथि।”
हरियाणाक मुख्यमंत्री नायब सिंह सैनी सोशल मीडिया प्लेटफॉर्म एक्स पर लिखलनि, “इनेलो सुप्रीमो आ हरियाणाक पूर्व मुख्यमंत्री चौधरी ओम प्रकाश चौटालाक निधन अत्यन्त दुखद अछि। हम हुनका अपन विनम्र श्रद्धांजलि अर्पित करैत छी। ओ जीवन भरि राज्य आ समाजक सेवा कयलनि। ई देश आ हरियाणाक राजनीतिक लेल अपूरणीय क्षति अछि। हम भगवान श्रीरामसँ प्रार्थना करैत छी जे दिवंगत आत्माकेँ हुनक चरणमे स्थान प्रदान करथि आ शोकग्रस्त परिवारकेँ ई दुःख सहबाक शक्ति प्रदान करथि।”
उत्तर प्रदेशक मुख्यमंत्री योगी आदित्यनाथ सेहो ओम प्रकाश चौटालाक निधनपर दुख व्यक्त कयलनि। ओ एकटा एक्स पोस्टमे लिखलनि, “हरियाणाक पूर्व मुख्यमंत्री ओम प्रकाश चौटालाक निधन अत्यन्त दुखद अछि। हम हुनका अपन विनम्र श्रद्धांजलि अर्पित करैत छी। हम भगवान श्रीरामसँ प्रार्थना करैत छी जे दिवंगत आत्माकेँ हुनक चरणमे स्थान प्रदान करथि आ शोकग्रस्त परिवार आ हुनक दुःखी समर्थकसभकेँ ई असीम दुःख सहबाक शक्ति प्रदान करथि।”
हरियाणाक पूर्व मुख्यमंत्री ओम प्रकाश चौटालाक निधन शुक्रकेँ भऽ गेल। ८९ सालक आयुमे ओ गुरुग्राम स्थिति अपन आवास पर अंतिम साँस लेलनि। ओ पिछला किछु दिनसँ अस्वस्थ चलि रहल छलथि।
