दरभंगामे कृषि विभागक सचिव संजय अग्रवालक निर्देश पर सदर थाना क्षेत्रके लोआम गाममे खेतमे पराली जराबयक मामिलामे तीनटा किसानक खिलाफ पैघ कारवाई कयल गेल अछि। हुनकर कृषि पंजीकरण पर रोक लगा देल गेल अछि। एहि कारवाईक बाद एहि तीनू किसानकेँ अगिला पाँच साल धरि कोनो सरकारी कृषि सुविधा नहि भेटत।
कहल जाइत अछि जे कृषि विभागक सचिव संजय कुमार अग्रवाल पटनासँ दरभंगा होइत सहरसा जा रहल छलाह। एहि दौरान एनएच २७ पर सदर थाना क्षेत्रक लोआम गामक खेतमे पराली जराओल जा रहल छल। ई देखि जिला कृषि पदाधिकारी विपिन बिहारी सिन्हाकेँ फोन कऽ पराली जरयबाक सूचना देलनि आ सम्बन्धित किसानक विरुद्ध कारवाई करबाक निर्देश देलनि। जहिना कृषि सचिवक आगमनक सूचना दरभंगा पहुँचल, कृषि विभागक उपनिदेशक संजय नाथ तिवारी सहित सभ पदाधिकारी आननफाननमे लोआम पहुँचलाह आ मामिलाक जानकारी देलनि। एकर बाद आरोपी किसान कैलाश प्रसाद बरोलिया, राजेन्द्र कुमार आ मकसूद आलमक कृषि पंजीकरण रद्द कऽ देल गेल ।
एहि कारवाईक बाद क्षेत्रक किसानसभमे हड़कम्प मचि गेल अछि। जिला कृषि पदाधिकारी विपिन बिहारी सिन्हा कहलनि जे लोआम गामक तीन किसानक कृषि पंजीकरण रद्द कऽ देल गेल अछि। आब एहि तीनू किसानकेँ अगिला पांच साल तक कोनो सरकारी कृषि सुविधाक लाभ नहि भेटत। ओ पूरा जिलाक किसान सभसँ अपील कयलनि अछि जे कोनो किसान खेतमे पराली नहि जराबी। जँ जरबैत पकड़ल जायब तँ कार्रवाई कएल जायत।
