बिहार कारा दिवसक अवसर पर बेनीपुर उपकारामे बंदी सबहक बीच भव्य सांस्कृतिक आ खेलकूद प्रतियोगिताक आयोजन कयल गेल । ओहि दौरान उपकाराक सभ वार्ड , परिसर आ बगीचाक साफ सफाई केर संग-संग आकर्षक ढंगसँ सजाओल गेल छल । एहि अवसर पर सहायक कारा उपाधीक्षक रत्नेश कुमार राय बतेलनि जे कारा अधीक्षक श्रीमती स्नेह लता केर निर्देशनमे आई उपकारा परिसरमे बंदी सबहक बीच गीत-संगीत, खेलकूद , क्विज प्रतियोगिता केर संग-संग वाद-विवाद आदि प्रतियोगिताक आयोजन कयल गेल ।
एहि केर संगहि संग महिला बंदी सबहक लेल नींबू – चम्मच रेस , सुई – धागा प्रतियोगिता , म्यूजिकल चेयर प्रतियोगिता सहित सभ कैदी लेल रस्सी प्रतियोगिता आयोजित कयल गेल, जाहिमे आठ टीम भाग लेलक ।प्रतियोगिताक सफल प्रतिभागी सबहक बीच पुरस्कार वितरण कयल गेल। प्रतिभागीक रूपमे 183 पुरुष आ महिला बंदी सभ भाग लेलन्हि।
ओहि अवसर पर उपकारा चिकित्सक डॉ० सलमान रजा , सहायक रोशन कुमार सहित अन्यान्य कारा रक्षक आ पुलिस कर्मी उपस्थित छलाह।
