लोकसभा अध्यक्ष ओम बिड़ला शुक्रदिन विपक्षी दलक हंगामाक कारण लोकसभाक कार्यवाही मात्र ४३ सेकेण्डमे स्थगित कऽ देलनि।
ओ एहि बातपर जोर देलनि जे कोनो बात नहि होइ से चलतै, मुदा हम सदनक गरिमा नहि खसय देब। ओ विपक्षी सांसदसँ पुछलनि, “ई प्रश्नकाल अछि, की अहां नहि चाहैत छी जे सदन चलय ? अहां नहि चाहैत छी जे प्रश्नकाल चलय ?”
ओ कहलनि, “सदन गरिमा आ उच्च कोटिक परम्परासँ चलत। हम नहिं तऽ गरिमाकेँ खसय देब आ ने सदनक भीतर मर्यादा कम होबय देब।”
ओ कहलनि, “हम अहांसँ अनुरोध करैत छी जे प्रश्नकालमे सहयोग करू।” एकर बाद लोकसभा अध्यक्ष सदनक कार्यवाही एक घंटा लेल स्थगित कऽ देलनि।
उल्लेखनीय अछि जे २५ नवम्बरसँ सदनमे विपक्षी दल द्वारा लगातार हंगामा भऽ रहल अछि।
लोकसभाक कार्यवाही शुरू भेलाक बाद अध्यक्ष ओम बिड़ला आबि अपन सीट लेनेहें छलाह कि विपक्षी सांसद हंगामा करय लगलाह। कांग्रेस नेता राहुल गाँधीक उपस्थितिमे कांग्रेस नेता लोकनि सदनमे हंगामा करैत रहलाह।
विपक्षी सांसद लोकसभामे कतेको मुद्दा उठौने छथि। एहिमे मुख्य रूपसँ सम्भल हिंसा शामिल छल।
बाबासाहेब भीम राव अम्बेडकरक पुण्यतिथिक अवसर पर कांग्रेस नेता प्रियंका गांधी वाड्रा सहित विपक्षी नेता संविधानक एकटा पुस्तक लऽ कऽ पहुँचलाह आ ‘जय संविधान’क नारा सेहो देलनि।
कांग्रेस सांसद गौरव गोगोई कहलखिन, “सरकारकेँ बुझबाक चाही जे किसानक मुद्दा गंभीर अछि। सरकारकेँ किसानक लेल समाधानक मार्ग प्रशस्त करबाक चाही। हम किसानकेँ अनदेखा नहि कए सकैत छी। एहि बेर किसानकेँ झूठा आश्वासन नहि देल जयबाक चाही।”
