बिहारक चारिटा विधानसभा सीटपर भेल उपचुनावमे महागठबंधनकेँ करारी पराजयक सामना करय पड़ल अछि। रामगढ़, तारारी, इमामगंज आ बेलागंज निर्वाचन क्षेत्रक उपचुनावक मतगणना पूरा भऽ गेल अछि। एनडीए केर उम्मीदवार चारु सीट पर जीत हासिल कयलक अछि।
बेलागंज विधानसभा उपचुनावमे जदयू केर मनोरमा देवी राजदक विश्वनाथ कुमार सिंहकेँ २१,३९१ वोटसँ हरा राजदक तीन दशक पुरान गढ़केँ ध्वस्त कऽ देलनि।
भारतीय जनता पार्टी (भाजपा) तरारीमे पहिल बेर जीतल। बाहुबली नेता सुनील पाण्डेयक पुत्र विशाल प्रशांत भाकपा (माले)क राजू यादवकेँ १०,६१२ मतसँ पराजित कयलनि।
गया जिलाक इमामगंजमे केन्द्रीय मंत्री जीतन राम मांझी केर पुतौह दीपा मांझी राजदक रोशन मांझीकेँ ५,९४५ वोटसँ हरा कए अपन पारिवारिक विरासत जारी रखलीह। एतय जन सुराजक जितेन्द्र पासवानकेँ तेसर स्थानसँ संतुष्ट रहय पड़लनि।
रामगढ़मे भाजपाक अशोक सिंह बसपाक सतीश उर्फ पिंटू यादवकेँ १३६२ मतक अन्तरसँ पराजित कयलनि। राजद प्रदेश अध्यक्ष जगदानंद सिंहक बेटा आ सांसद सुधाकर सिंहक भाई अजित सिंह तेसर स्थान पर रहलाह। अपन हार देखि ओ मतगणना कक्षकेँ बीचमे छोड़ि देलनि।
बिहारक चारिटा सीट, तारारी, बेलागंज, इमामगंज आ रामगढ़क मतदाता १३ नवम्बर केँ मतदान कयने छलाह। एहि उपचुनावकेँ आगामी बिहार विधानसभा चुनावक सेमीफाइनलक रूपमे देखल जा रहल अछि। उपचुनाव दुनू गठबंधनक लेल प्रतिष्ठाक विषय छल। एहि उपचुनावमे ३८ उम्मीदवारक प्रतिष्ठा दांव पर लागल छल।
बिहार उपचुनावमे एनडीए केर प्रचंड चारु सीटक जीत पर राज्यसभा सांसद एवं जदयू केर राष्ट्रीय कार्यकारी अध्यक्ष संजय झा कहलनि, “बेलागंज, तारारी, इमामगंज आ रामगढ़ विधानसभा क्षेत्रक एनडीए उम्मीदवार सभकेँ पैघ अन्तरसँ उपचुनाव जितबाक लेल हार्दिक बधाई आ उज्ज्वल कार्यकालक लेल शुभकामना। संगहि, चारि विधानसभा क्षेत्रक लोकक प्रति कृतज्ञता। बिहारक चारिटा विधानसभा क्षेत्रक उपचुनावकेँ विपक्ष द्वारा २०२५क विधानसभा चुनावक सेमीफाइनल कहल जा रहल छल। बिहारक जनता मुख्यमंत्री नीतीश कुमार आ प्रधानमंत्री नरेन्द्र मोदीक नेतृत्वमे शत-प्रतिशत विश्वास व्यक्त कयलक अछि आ २०२५क विधानसभा चुनावक लेल स्पष्ट संकेत देलक अछि।”
आगू संजय झा कहलनि, “मुख्यमंत्री नीतीश कुमारक सक्षम आ दूरदर्शी नेतृत्वमे २०१०क तुलनामे २०२५क बिहार विधानसभा चुनावमे नीक परिणामक लेल हमरा विश्वास अछि आ एहि उपचुनावक जनादेश ओकर अनुरूप अछि। एहि जनादेशक निहितार्थ स्पष्ट अछि : अगिला साल बिहारसँ विपक्षक सफाया होमय जा रहल अछि।”
