बैंगनीमे रेलवे हाॅल्ट निर्माणक मांग केर लऽ कय बैंगनी हाॅल्ट निर्माण संघर्ष समिति द्वारा हाॅल्ट निर्माण लेल अधिगृहित कयल गेल जमीन लग क्षेत्रक हजारों लोक जोरदार धरना आ प्रदर्शन कयलन्हि । भोरेसँ क्षेत्रक लोक सभ निर्धारित स्थल पर जुटल छलाह । लोक सभकेँ कतौसँ जानकारी भेटल छलन्हि जे डी आर एम समस्तीपुर एहि रूटसँ निरीक्षणक लेल जायवला छथि। लोक सभ हुनकासँ 2022 मे भेल समझौताक कार्यान्वयन केर संबंधमे जानय चाहैत छलाह।
सत्याग्रहीक नेतृत्व कऽ रहल समितिक अध्यक्ष रामधनी झा आ पूर्व मुखिया राजन कुमार झा बतेलनि जे एहि रेल लाइनक निर्माणेक समयसँ एतय क्षेत्रवासीक मांग पर रेलवे द्वारा हाॅल्ट निर्माण लेल भूमि अधिगृहित कयल गेल छल । नक्शामे होल्ट चिन्हित कयल गेल छल । उद्घाटनक समय सेहो रेल मंत्री द्वारा शीघ्रहि होल्ट निर्माणक भरोसा देल गेल छल। बिलंबक कारणे कतेको बेर रेल रोको सत्याग्रह कयल गेल। कोनो कारवाई नहि होइत देखि आजिज भऽ कय स्थानीय लोक सभ संघर्ष समितिक नेतृत्वमे २०२१ मे अनिश्चितकालीन रेल रोको सत्याग्रह शुरू कयने छल । पहिने डी एम दरभंगाक कार्यालय कक्षमे संबंधित अधिकारी सभ द्वारा धरनास्थल पर पहुंचिकय निर्माण काज शुरू करबाक बात पर सहमति बनल मुदा अधिकारी दल केर धरनास्थल पर नहि पहुंचलाक कारणे सत्याग्रह चलैत रहल । ग्यारह महीना बाद डी आर एम स्वयं 2022 मे धरनास्थल पर पहुंचिकय सत्याग्रही सभसँ शीघ्रहि निर्माणक आश्वाशन दऽकय धरना समाप्त करौने छलाह।
दू वर्ष बीत गेलाक बादो हाॅल्ट निर्माणक दिशामे कोनो प्रगति नहि होइत देखि लोक सभमे आक्रोश बढ़ल जा रहल अछि। ओतहि सत्याग्रहक सूचना पर आर पी एफ केर डी एस पी रोशन कुमार गुप्ता, बहेड़ा थानाक बी बी एन सिंह , इंस्पेक्टर मनोज सोड़ा, संतोष कुमार , सत्य प्रकाश पुलिस बल संग उपस्थित छलाह। चारि बजे सत्याग्रहीकेँ आर पी एफ केर एसपीसँ बातचीत कराओल गेल जाहिमे २८ तारीखसँ पहिने वार्ताक समय निश्चित कऽ समाधान करबाक आश्वाशन पर सत्याग्रह समाप्त कयल गेल । रेलवे आरपीएफसँ इंद्र देव सिंह , मनोज हुरो , प्रभात कुमार , जीआरपी , प्रखंड विकास पदाधिकारी प्रवीण कुमार , अंचलाधिकारी अश्विनी कुमार , बहेड़ा थानासँ बी बी एन सिंह धरनास्थल पर मौजूद छलाह।
