अज्ञात चोर ६ टा घर आ १ टा दोकानमे कयलक लाखो टाकाक चोरी

बेनीपुर समदिया
*

बहेड़ा थाना क्षेत्रक पोहद्दी गाममे देर राइत अज्ञात चोर सभ आधा दर्जन घर आ एकटा दोकानक ताला तोड़ि कय लाखो टाका मूल्यक संपत्ति चोरी कऽ कय चलैत बनल। विदित अछि जे पछिला दू मासमे बहेड़ा थाना क्षेत्रमे दू दर्जनसँ बेसी चोरीक घटनाक चोर सभ अंजाम दऽ कय पुलिसकेँ खुल्लम खुल्ला चुनौती दऽ रहल अछि । एखनधरि पुलिस एक्कहुँटा चोरीक घटना केर सफल उद्भेदन नहि कऽ सकल अछि।

बताओल जा रहल अछि जे चोर सभ गाममे निशिभाग रातिमे अनिल कुमार सहनी आ जय किशोर चौधरीक दुकानक ताला तऽ तोड़लक मुदा किछूओ कोनो सामानक चोरी करबाक बात सामने नहि आयल अछि। मखान फोड़य गामसँ बाहर गेल रामविलास सहनी, बिहारी साहनी आ प्रयाग साहनीक बंद घर सभकेँ चोर अपना निशाना बनाकय लाखों टाका मूल्यक गहना गुड़ियाक चोरी कऽ लेलक । चोरी हेबाक घटनाक जानकारी भेटला पर बहेड़ा थाना पुलिस घटनास्थल पर पहुंचि कय अगल-बगलक सी-सी टी वी फुटेज खंगाइल रहल छथि ।

एहि संबंधमे पूछला पर प्रभारी थाना अध्यक्ष दिव्या कुमारी चोरीक घटनाकेँ स्वीकार करैत कहलनि जे गृहस्वामी गामसँ बाहर छथि । हुनका सभकेँ गाम अयलाक बादे चोरी भेल समानक मूल्यांकन कयल जायत आ ओकरा बादे अग्रिम कारवाई सुनिश्चित कयल जायत।