लोकसभामे विपक्षक नेता राहुल गांधी शुक्रकेँ एकटा एहेन व्यवस्थाक आह्वान कयलनि जाहिसँ लोकक कौशलकेँ हुनकर हक भेटय आ सबहक योगदानक सम्मान होय। ओ दिवालीक एकटा वीडियो साझा कयलनि जाहिमे ओ पेंटिंग श्रमिक आ कुम्हारक सङ्ग बातचीत करैत देखल जा रहल छथि।
कांग्रेसक पूर्व अध्यक्ष यूट्यूब पर नौ मिनटसँ अधिकक एकटा वीडियो पोस्ट कयलनि जाहिमे ओ अपन भतीजा रेहान राजीव वाड्रासँ बातचीत करैत सेहो देखल जा रहल छथि। ओ कहलनि, “विशेष लोकक संग एकटा यादगार दिवाली – हम एहि दिवालीकेँ किछु चित्रकार भायक संग काज कऽ आ एकटा कुम्हारक परिवारक संग माटिक दीया बना कऽ मनयलहुँ।”
राहुल कहलनि, “हम हुनक काजकेँ लगसँ देखलहुँ, हुनक कौशल सीखबाक प्रयास कयलहुँ आ हुनक कठिनाई आ समस्याकेँ बुझलहुँ। ओ घर नहि जाइत छथि। हम सभ पाबनि-तिहार खुशी-खुशी मनबैत छी आ किछु पाइ कमाबय लेल ओ अपन गाम, शहर, परिवार बिसरि जाइत छथि।”
ओ कहलनि, “ओ माटिसँ खुशी बनाबैत छथि। दोसरक पाबनि-तिहारकेँ रोशन करैत की ओ स्वयं प्रकाशमे रहि पाबैत छथि ? जे घर बनबैत अछि ओ मुश्किलसँ अपन घर चला पाबैत अछि।”
ओ कहलनि जे दीपावलीक अर्थ अछि ओ प्रकाश जे गरीबी आ असहायताक अन्हारकेँ दूर कऽ सकैत अछि।
ओ कहलनि, “हमरासभकेँ एकटा एहेन प्रणाली बनयबाक आवश्यकता अछि जाहिमे लोकक कौशलकेँ उचित रूपसँ मान्यता देल जाय आ योगदानकेँ मान्यता देल जाय जाहिसँ सभक दिवाली सुखद होए। हमरा आशा अछि जे ई दिवाली सबहक जीवनमे समृद्धि, प्रगति आ प्रेम लऽ कऽ आओत।”
वीडियोमे राहुल गांधी अपन १० जनपथ निवासमे मजदूरक सङ्ग काज करैत आ अपन भतीजाक सङ्ग देबाल पर चित्रकारी सीखैत देखल जा रहल छथि। वीडियोक दोसर भागमे राहुल गाँधी अपन पाँच बेटीक सङ्ग माटिक दीप बनबयवला एकटा महिलाक घर जाइत छथि।
राहुल गाँधी माटिक बर्तन बनयबामे अपन हाथ आजमाबैत छथि आ दीया बनाबैत छथि, जे ओ कहैत छथि जे ओ अपन माय आ बहिनकेँ देताह।
कन्याकुमारीसँ कश्मीर धरि अपन भारत जोड़ो यात्रा आ मणिपुरसँ मुम्बई धरि भारत जोड़ो न्याय यात्राक बादसँ राहुल गाँधी यांत्रिकी क्षेत्रक विभिन्न वर्गक लोकसभ जेना मोचीसँ लऽ कऽ मजदूर आ बस चालक धरिसँ बातचीत करैत आबि रहल छथि। ओ प्रायः अपन विभिन्न संवादक वीडियो पोस्ट करैत छथि आ समाजक विभिन्न वर्गक दुर्दशाकेँ उजागर करैत छथि।
