बिहारक नीतीश सरकार अंततः शिक्षक सभक बात पर सहमत भऽ गेल छथि। आब ६ नवम्बर कs खरनाक अवसर पर सेहो पूरा राज्यमे स्कूल बंद करय केर आदेश जारी कयल गेल अछि। छठि महापर्वक अवसर पर छुट्टी कम करबासँ शिक्षक लोकनिक नाराज हेबाक समाचार भेटल छल।
ओतहि बुधदिन मीडियासँ बातचीत करैत शिक्षा मंत्री सुनील कुमार कहने छलाह जे राज्यमे नीतीश कुमारक सरकार अछि जे केकरो संग गलत नहि होबए देत। सरकार शिक्षक संघक माँग पर विचार कऽ रहल अछि। हम एहि मुद्दा पर विभागक अधिकारी सभसँ लगातार गप कऽ रहल छी, जे उचित होयत हम करब। मीडियाक सोझाँ जानकारी देलाक बाद सरकार साँझमे छुट्टीक आदेश जारी कयलक।
एहि साल सरकार द्वारा घोषित छुट्टीमे कटौती कयल गेल अछि। शिक्षकसभकेँ दिवाली पर एक दिन आ छठिमे दू दिनक छुट्टी देल गेल अछि। शिक्षकक आरोप अछि जे दीपावलीसँ छठी धरि हर साल स्कूल बंद रहैत अछि। छठि पूजा बीत गेलाक बादे स्कूल खुजैत अछि। मुदा एहि बेर नहाय-खाय आ खरनाक लेल कोनो छुट्टी नहिं अछि।
छठिक छुट्टीक सम्बन्धमे राज्यमे राजनीति तेज भऽ गेल अछि। विपक्ष एहि मुद्दा पर सरकारकेँ घेरय लागल अछि। संगहि भारतीय जनता पार्टी एकरा लेल विपक्षकेँ दोषी ठहरौलक अछि। मीडियासँ बातचीत करैत भाजपा नेता लोकनि कहलनि जे छुट्टीक ई कैलेंडर महागठबंधन सरकारक समय बनाओल गेल छल जखन राजद आ कांग्रेस सत्तामे छल। अतः हुनका एहि मुद्दा पर बजबाक अधिकार नहि अछि।
