जम्मू-कश्मीर विधानसभा चुनावक दोसर चरणक लेल मतदान भेल अछि। निर्वाचन आयोगक अनुसार, पाँच जिलाक २६ सीटक दोसर चरणमे दुपहरिया ५ बजे धरि ५४% मतदान भेल। मतदातामे वोट देबाक उत्साह देखल जा रहल अछि। जम्मू-कश्मीरमे विधानसभा चुनाव तीन चरणमे होयत। २६ सीटक लेल कुल २३९ उम्मीदवार चुनाव मैदान मे छथि।
भोरसँ मतदाता मतदान केन्द्रपर कतारमे लागल देखल जा रहल छलथि। लोक मतदानक प्रति उत्साहित छथि। जम्मू संभागक पुंछ, राजौरी आ रियासी आ घाटीक श्रीनगर, बडगाम आ गांदरबल सहित केंद्र शासित प्रदेशक छह जिलामे अधिकांश मतदान केन्द्रपर उत्सवक माहौल बनल रहल।
स्थानीय पुलिस आ सुरक्षा बल मतदान केन्द्रपर आबयवला मतदातासभकेँ मुस्कान बाँटैत देखल गेलाह। जम्मू-कश्मीरमे दोसर चरणक चुनावमे कुल २५.७८ लाख मतदाता अपन मताधिकारक प्रयोग करबाक पात्र छथि। मतदान भोर ७ बजे शुरू भेल आ साँझ ६ बजे समाप्त होयत।
प्रधानमंत्री नरेन्द्र मोदी सोशल मीडिया प्लेटफॉर्म एक्स पर एकटा पोस्टमे जम्मू-कश्मीरक मतदातासभसँ मतदान करबाक अपील करैत कहलनि, “जम्मू-कश्मीरमे आइ दोसर चरणक मतदान अछि। हमर सभ मतदातासँ अपील अछि जे ओ अपन वोट देथि आ लोकतंत्र केर मजबूत करयमे अपन महत्वपूर्ण भूमिका निभाबथि। एहि अवसर पर पहिल बेर मतदान करय जा रहल सब युवा मित्र सभकेँ हमर बधाई।”
जम्मू-कश्मीरक पूर्व मुख्यमंत्री आ नेशनल कॉन्फ्रेंस (एनसी)क उपाध्यक्ष उमर अब्दुल्ला, जम्मू-कश्मीर कांग्रेस प्रमुख तारिक हमीद कर्रा, जम्मू-कश्मीर भाजपा अध्यक्ष रविंदर रैना, पूर्व मंत्री अली मोहम्मद सागर, आसिया नाकाश, अब्दुर रहीम राथर, हकीम मोहम्मद यासीन, चौधरी जुल्फिकार आ जम्मू-कश्मीर अपनी पार्टीक प्रमुख सैयद अल्ताफ बुखारी दोसर चरणमे वरिष्ठ राजनीतिक नेतामे शामिल छथि।
नेकां आ कांग्रेस चुनाव पूर्व गठबंधन बनौने अछि। नेकां ५२ सीटपर अपन उम्मीदवार उतारने अछि, जखन कि कांग्रेस ३१ सीटपर चुनाव लड़ि रहल अछि। जम्मू-कश्मीर विधानसभा चुनावक तेसर आ अंतिम चरणक मतदान १ अक्टूबरकेँ होयत आ मतगणना ८ अक्टूबरकेँ होयत।
