बंगाल आ बिहार एसटीएफ केर पैघ कार्रवाई : भागलपुरमे मिनी गन अवैध कारखानाक भंडाफोड़
*
बंगाल आ बिहार एसटीएफक एकटा टीम भागलपुरक चांदपुर गाममे एकटा मिनी गन कारखानाक भंडाफोड़ कयलक अछि, जाहिसँ अवैध हथियार उत्पादनक एकटा पैघ नेटवर्कक पर्दाफाश भेल अछि। एसटीएफ स्थानीय पुलिसक मदतिसँ अमडंडा थाना क्षेत्रमे छापा मारलक जे थानासँ मात्र आधा किलोमीटर दूर स्थित छल। एहि अभियानमे पाँच गोटेकेँ गिरफ्तार कयल गेल, जाहिमे तीनटा मुंगेरक आ एकटा खगड़िया जिलाक अछि।
कारवाईक दौरान पैघ संख्यामे अर्ध-निर्मित आ निर्मित बैरलक सङ्ग-सङ्ग हथियार बनयबामे उपयोग कयल जायवला मशीन आ अन्य सामग्री बरामद कयल गेल। जांचमे आशंका छल जे ई हथियार नक्सलवादीकेँ आपूर्ति कयल जाइत अछि, मुदा भागलपुरक एसएसपी आनन्द कुमार एहि दावाकेँ खारिज कऽ देलनि अछि। ओ कहलनि जे सभ अभियुक्तसँ गहन पूछताछ कयल जा रहल अछि, आ आगूक जाञ्चसँ आओर खुलासा भऽ सकैत अछि।
एहि घटनासँ ई स्पष्ट होइत अछि जे भागलपुर सन शांतिपूर्ण क्षेत्रमे सेहो अवैध हथियार निर्माणक संगठित नेटवर्क अछि, जे मात्र राज्यक नहि अपितु सम्पूर्ण क्षेत्रक सुरक्षाक लेल खतरा अछि। एसटीएफ के एहि कार्रवाई सँ अपराधीकेँ कड़ा संदेश भेटल अछि, मुदा दोसर तरफ पुलिस प्रशासन पर इहो सवाल उठैत अछि जे ई अवैध कारखाना एतेक लगमे, एतेक दिन धरि कोना चलैत रहल।
एहेन मामलामे स्थानीय पुलिसक तत्परता आ सतर्कता पर सेहो पुनर्विचार करबाक आवश्यकता अछि।
