सीतामढ़ी पुलिस नशीला दवाई आ प्रतिबंधित गोलीक संग चारिटा तस्करकेँ कयलक गिरफ्तार

सीतामढ़ी समदिया
*

सीतामढ़ीक सोनबरसा थानाक पुलिस गुप्त सूचनाक आधार पर बुधदिन देर साँझ अलग-अलग जगह पर छापा मारलक। एहि कारवाईमे पुलिस पैघ मात्रामे कोरेक्स आ नशीला गोली बरामद कयलक अछि। एकर संगहि चारिटा तस्करकेँ सेहो गिरफ्तार कयल गेल अछि। गिरफ्तार तस्करक पहिचान चांदनी चौक सोनबरसा गामक निवासी अरविन्द महतोक पुत्र नवीन कुमार महतो, चिलरा गामक निवासी अमीरी राउतक पुत्र बबलू राउत, रूपनारायण प्रसादक अरुण कुमार आ चिलरी गामक निवासी रामेश्वर महतोक पुत्र रोशन कुमारक रूपमे भेल अछि।

थाना प्रभारी धर्मेन्द्र कुमार कुशवाहा बतौलनि जे भारत-नेपाल सीमा हनुमान चौकसँ पूर्वी सड़क पर टायर पंचरक दोकान लग तीनू तस्कर लगसँ अलग-अलग बैगमे ड्रग कोरेक्स (१०० मिलीलीटर) केर ५० बोतल बरामद कयल गेल। पूछताछक आधार पर चांदनी चौकमे नवीन कुमारक घरपर तलाशी लेल गेल, आ एकटा प्लास्टिकक बोरामे मादक पदार्थ कोरेक्सक ४५७ बोतल आ ६०० टुकड़ा प्रतिबंधित गोली बरामद कयल गेल।

नारकोटिक ड्रग्स एंड साइकोट्रोपिक सब्सटेंस एक्टक धाराक तहत प्राथमिकी दर्ज कयल गेल आ गिरफ्तार कयल गेल चारु तस्करकेँ न्यायिक हिरासतमे पठा देल गेल।