केन्द्रीय मंत्री चिराग पासवानक पार्टी लोजपा (आर) आब झारखण्डमे सेहो अपन राजनीतिक दाँव चलय चाहैत छथि। एहि लेल पार्टी २५ अगस्त रविकेँ राँचीमे राष्ट्रीय कार्यकारिणीक बैसार बजौलनि अछि।
शहरक एकटा पैघ होटलमे होबयवला एहि बैसारमे झारखंडमे नवम्बर-दिसम्बरमे होबयवाला विधानसभा चुनावक संग-संग हरियाणा आ अगिला साल बिहारमे विधानसभा चुनावक रणनीति पर महत्वपूर्ण निर्णय लेबाक सम्भावना अछि।
ई बैसार एहि अर्थमे सेहो महत्वपूर्ण मानल जाइत अछि जे एहिमे पार्टीक राष्ट्रीय अध्यक्षक चुनाव होयबाक अछि। ई निश्चित अछि जे एक बेर फेर चिराग पासवान सर्वसम्मतिसँ एहि पद पर चुनल जयताह।
बैसारमे भाग लेबाक लेल राष्ट्रीय कार्यकारिणीक कतेको पदाधिकारी आ सदस्य शनिदिन रांची पहुँचल छथि। बैसारसँ पहिने लोजपा (आर) केर झारखंड इकाई राज्यमे २८ विधानसभा सीटक पहिचान कयलक अछि आ पार्टीक केन्द्रीय नेतृत्वकेँ चुनाव लड़बाक प्रस्ताव पठौलक अछि। बैसारमे एहि प्रस्तावपर चर्चा होयत आ ओकर बाद ई तय होयत जे एनडीए फोल्डरमे कतेक आ कोन सीटक दावा कयल जाय।
पार्टीक प्रदेश अध्यक्ष वीरेन्द्र प्रधान कहैत छथि जे हम झारखंड विधानसभा चुनावमे मजबूतीसँ जयबाक लेल तैयार छी। हम राष्ट्रीय नेतृत्वक निर्णय आ निर्देशमे आगू बढ़ब।
मुदा, झारखण्डक राजनीतिक इतिहासमे लोजपा आइ धरि कहियो कोनो चुनाव नहिं जीतल अछि। पार्टीक कहियो सुव्यवस्थित वा मजबूत संगठनात्मक संरचना नहिं रहल अछि। एहेन स्थितिमे ई कहब मुश्किल अछि जे चिराग पासवान आ हुनकर पार्टी एनडीए नेतृत्व पर कतेक मजबूतीसँ सीटक दावा कय पाओत।
हालमे संपन्न लोकसभा चुनावमे झारखण्डमे मात्र दूटा दल एनडीए फोल्डरमे चुनाव मैदानमे छल, भाजपा आ आजसू। आब विधानसभा चुनावमे नीतीश कुमारक पार्टी जेडीयू आ फेर चिराग पासवानक पार्टी लोजपा (आर) केर सीटक दावा पर राजग केर सबसँ पैघ घटक भाजपासँ कोनो प्रतिक्रिया नहिं भेटल अछि।
