आगामी बिहार विधानसभा चुनाव 2025 सँ संबंधित प्रशासनिक तैयारी शुरू भऽ गेल अछि। एहि सिलसिलामे राजनगर प्रखंड मुख्यालय स्थित उत्पादन एवं प्रशिक्षण भवनमे निर्वाचक निबन्धन पदाधिकारी 37 राजनगर विधानसभा सह भूमि सुधार उप समाहर्ता झंझारपुर केर अध्यक्षतामे बूथ स्तरीय पदाधिकारी सभक बैसारमे कतेको निर्देश देल गेल।
एहि बैसारमे निर्बाचक निबन्धन पदाधिकारी द्वारा निर्देश देल गेल कि सभ बूथ स्तरीय पदाधिकारी अपन अपन क्षेत्र केर सभ मतदाता सभक दरबाजा पर जा-जा कय सूचना जुटाबी कि कोन मतदाताक मृत्यु भऽ गेल, अथवा केओ बाहर जा कय बसि गेल छथि। 1 जनवरी 2025 तकक तिथिमे जे युवक युवती 18 वर्षक भऽ जेथिन हुनक नाम मतदाता सूचीमे अंकित कयल जाय।
पदाधिकारी इहो कहलनि जे सभ बी एल ओ अपन अपन मोबाइलमे बी एल ओ एपसँ जुड़ल रहू आ अद्यत्तन रहू। पदाधिकारी द्वारा बताओल गेल जे सभ बी एल ओ फॉर्म नम्बर 6, 7, आ 8 केर निक जँका ऑन लाईन आ ऑफलाइन दुनुमे भरबाक तैयारी करू।
एहि बैसारमे राजनगरक दर्जनों बी एल ओ केर सँग राजनगर प्रखंड विकास पदाधिकारी प्रभात रंजन सेहो उपस्थित छलाह।
