बेगूसरायमे परिवारक चारि सदस्य पर धारदार हथियार आ तेजाबसँ हमला, तीन गोटेक हत्या

बेगुसराय
*

मिथिला क्षेत्रीय बिहारमे एके परिवारक चारि गोटेक बदमाश द्वारा धारदार हथियारसँ हमला कयल गेल अछि। जानलेवा हमलामे तीनटा लोकक जान चलि गेल जखन कि बेटा अस्पतालमे जीवनक लेल लड़ि रहल अछि।

मिथिला क्षेत्रीय बिहारक बेगूसराय जिलामे अज्ञात हमलावर एक परिवारक चारि सदस्यक हत्या करय केर प्रयास कयलक। तीनटा लोकक मृत्यु भऽ गेल जखन कि एकटाक हालत गम्भीर अछि। ई घटना रसीदपुर थाना क्षेत्रक चिरंजीवीपुर गामक अछि। जानकारीक अनुसार, उपद्रवी सभ घरमे सुतल पति-पत्नी आ ओकर दूनू बच्चापर धारदार हथियारसँ हमला कयलक आ ओकर गला काटि देलक। एतबे नहिं, आरोपी पीड़ित पर तेजाब सेहो ढारि देलक। एहि घटनामे पति, पत्नी आ बेटीक मौकापर मृत्यु भऽ गेल, जखन कि एकटा बच्चा गम्भीर रूपसँ घायल भऽ गेल अछि। मृतकक पहिचान नागेन्द्र सिंहक पुत्र संजीवन महतो, हुनक पत्नी संजीता देवी आ १० वर्षक बेटी सपना कुमारीक रूपमे भेल अछि। ओतहि घायल बेटाक पहिचान ८ वर्षक अंकुश कुमारक रूपमे भेल अछि, जकर उपचार चलि रहल अछि।

एहि घटनाक बादसँ एहि क्षेत्रमे हड़कंप मचल अछि। परिवारक सदस्यक अनुसार संजीवन महतो अपन परिवारक संग घरमे सुतल छलाह। तखन अपराधी सभ घरमे घुसि पति, पत्नी आ दुनू बच्चाक गला धारदार हथियारसँ काटि देलक।

पुलिस मामिलाक जांच कए रहल अछि। स्थानीय लोकसभ बछवाड़ा थानाकेँ घटनाक सूचना देलनि, बछवाड़ा थानाक पुलिस घटनास्थल पर पहुँचि मामिलाक जाँच शुरू कऽ देलक। गामक लोकक कहब छनि जे ई पैघ घटना अपराधी सभ आपसी रंजिशमे कयलक। पुलिस पुरा मामिलाक पड़तालमे जुटल अछि, इहो कहल जा रहल अछि जे अपराधी सभ घटनाक बाद मृतकक शरीरपर तेजाब ढारि देने छल। एहि संबंधमे पुलिस एहि मामिलाक जाँच कऽ रहल अछि, मुदा एखन धरि ई पता नहिं चलल अछि जे ई घटना के कयलक आ किएक कयलक। पुलिस सभ पक्षकेँ ध्यानमे राखि जाँच कऽ रहल अछि।