हालहिमे कांग्रेस सांसद राहुल गांधी सोशल मीडियाक माध्यमसँ दावा कयलनि जे प्रवर्तन निदेशालय (ईडी) हुनका पर छापा मारबाक तैयारी कऽ रहल अछि। केंद्रीय मंत्री ज्योतिरादित्य सिंधिया राहुल गांधीक एहि बयान पर पलटवार कयलनि। राहुल गाँधी आ कांग्रेसपर निशाना साधैत ओ कहलनि जे जकर नीति भटकाबय आ झूठ बोलबाक अछि, ओ एहने नकारात्मक बयान दैत छथि।
ज्योतिरादित्य सिंधिया शनि दिन ग्वालियरमे मीडियासँ बातचीत करैत कहलनि जे जिनका विचलनक नीति अछि, झूठ बोलबाक नीति अछि, देशकेँ विकासक पथ पर देखैत गर्वक बजाय ईर्ष्याक भावना अछि, ओ एहन नकारात्मक बयान दैत छथि। आइ जे कांग्रेसक स्थिति भऽ गेल अछि ओ देशकेँ बढ़यबाक काज नहिं, बल्कि देशकेँ नकारात्मक सोच आ विचारधाराक पथ दिस लऽ जयबाक प्रयास कय रहल अछि। भाई-भाईकेँ बीच झगड़ा तय करबाक कोशिश कए रहल अछि। जे कांग्रेस पार्टी, हरदम प्रत्येक कमीशनक रिपोर्टक विरोध कयलक, मंडल आयोगक रिपोर्टक विरोध कयलक, आइ जाति-जातिक बात कय रहल अछि।
सिंधिया आगू कहलनि जे एहि चुनावमे सफाया भेल कांग्रेस पार्टी १३ राज्यमे अपन खाता नहिं खोललक, जतय-जतय भारतीय जनता पार्टीसँ सीधा मुकाबला भेल अछि, ओतय स्ट्राइक रेट मात्र २५ प्रतिशत अछि। २०१४, २०१९ आ २०२४ केर सीट लिअ, जँ अहाँ एहि तीनू चुनावमे कांग्रेसक जीतल सीट केर इकट्ठा करब तऽ कांग्रेस २०२४ केर चुनावमे वर्तमान भारतीय जनता पार्टीक भेटल २४० सीटक आंकड़ा तक नहिं पहुँच पाबि रहल अछि। ई हाल कांग्रेस पार्टीक भेल अछि। एहि लेल कोनो आन पर अंगुरी उठाबयसँ पहिने कांग्रेसकेँ अपन टेटर दिसि ताकय।
लोकसभामे विपक्षक नेता आ कांग्रेस सांसद राहुल गांधी सोशल मीडिया प्लेटफॉर्म एक्स केर माध्यमसँ दावा कयने छलाह कि ईडी हुनका पर छापा मारि सकैत अछि। ओ एक्स पोस्ट पर लिखलनि, “जाहिर अछि, टू इन वनकेँ हमर चक्रव्यूह भाषण पसिन्न नहिं पड़ल। ईडीक ‘अंदरूनी सूत्र’ हमरा कहैत छथि जे छापा मारबाक योजना बनाओल जा रहल अछि। खुजल हाथसँ प्रतीक्षा कय रहल छी।
संगहि संग राहुल गांधी प्रवर्तन निदेशालयकेँ टैग करैत लिखलनि कि चाह आ बिस्कुट हमरा तरफसँ।
