एखन धरि बिहारक उपमुख्यमंत्री सम्राट चौधरी भाजपा प्रदेश अध्यक्षक जिम्मेदारी निभा रहल छलाह। आब ई दायित्व दिलीप जायसवालकेँ देल गेल अछि। वर्तमानमे डॉ. जायसवाल राजस्व भूमि सुधार मंत्री छथि। ओ २००९ सँ लगातार विधान परिषदक सदस्य छथि। ओ वैश्य समुदायक छथि।
भारतीय जनता पार्टी (भाजपा)क केन्द्रीय नेतृत्व बिहारमे पैघ उलटफेर कयलक अछि। मात्र एक सालमे सम्राट चौधरीकेँ बिहार भाजपाक कमानसँ बाहर करैत डॉ. दिलीप जायसवालकेँ बिहारक कमान देल गेल अछि। ओतहि डॉ. दिलीप जायसवालकेँ प्रदेश भाजपा अध्यक्ष बनलाक खबरि केर बाद मिथिला क्षेत्रक सीमावर्तीक जनतामे खुशीक लहरि छा गेल अछि।
कहल जा रहल अछि जे लोकसभा चुनावमे कुशवाहा वोट जेना बिखरल छल से केंद्रीय नेतृत्वकेँ नीक नहिं लागल अछि। भाजपा सम्राट चौधरीकेँ जे प्रदेश अध्यक्ष बनओलक ओहिपर ओ खरा नहिं उतरलाह आ चुनावमे कुशवाहा वोट जेडीयू वा राजदकेँ गेल।
सूत्रक अनुसार सम्राट चौधरीकेँ प्रदेश अध्यक्षक पदसँ हटाबयमे मुख्यमंत्री नीतीश कुमारक सेहो हाथ अछि। सम्राट चौधरीकेँ हटयबाक पटकथा तखनेसँ लिखल गेल छल जखन नीतीश कुमार लोकसभा चुनावमे केन्द्रक मोदी सरकारकेँ समर्थन कयलनि।
डॉ. दिलीप जायसवाल वर्तमानमे बिहार सरकारमे राजस्व आ भूमि सुधार मंत्री छथि। हुनका मिथिला क्षेत्रीय सीमावर्तीक एकटा मजबूत नेता मानल जाइत अछि, सङ्गहि ओ एमएलसीक रूपमे काफी लोकप्रिय छथि। ओ लगातार तीन बेर विधान परिषदक सदस्य चुनल गेल छथि। संगहि ओ लगातार २१ सालसँ बिहार भाजपाक कोषाध्यक्ष सेहो छथि। एखने भाजपा हुनका एकटा पैघ जिम्मेदारी देलक अछि आ आब हुनका सिक्किम राज्यक प्रभारी सेहो बनाओल गेल अछि।
डॉ. दिलीप जायसवाल किशनगंज जिलामे माता गुजरी मेडिकल कॉलेज चलाबैत छथि, जकर ओ निदेशक सेहो छथि। डॉ. दिलीप जायसवालक सीमावर्ती क्षेत्रमे गहींर प्रवेश अछि, ओ वैश्य समुदायसँ छथि। एहि क्षेत्रमे पिछड़ा, सबसँ पिछड़ल आ मुसलमानक बीच हुनकालोकनिक मजबूत पकड़ अछि।
डॉ. जायसवाल स्वच्छ छविवला नेता मानल जाइत छथि। जहियासँ ओ राजस्व आ भूमि सुधार मंत्री बनलाह, तहियासँ स्वयं अपने विभाग पर अंगुरी उठा रहल छथि जे विभाग भ्रष्टाचारमे लिप्त अछि। एहन मानल जाइत अछि जे जेडीयू हो वा राजद सभ राजनीतिक दलक संग सेहो हुनक बहुत नीक संबंध अछि।
