शुक्रदिन (28 मार्च, 2025) केँ पटना हाईकोर्टसँ ई फैसला आयल अछि जे पुनः नहि होयत 70वीं बीपीएससी केर प्रारंभिक परीक्षा। फैसला संगहि ओहि सभ अभ्यर्थी सबकेँ पैघ झटका लागल अछि जिनका री-एग्जाम होयबाक आशा छल। एहि फैसलाक संगहि राज्य सरकार आ बिहार लोक सेवा आयोगकेँ एकटा पैघ राहत भेटल अछि। एम्हर कोर्टसँ मुख्य परीक्षा आयोजित करबाक सेहो आदेश देल गेल अछि।
आयोगक तरफसँ मेंस एग्जाम केर तारीख 25 सँ 30 अप्रैल तय कएल गेल अछि। पटना हाईकोर्टक एहि फैसलाक बाद कतेको अभ्यर्थी सभमे मायूसी छा गेल अछि। एहि बीच प्रतिक्रिया सभ सेहो आबय लागल अछि। शिक्षक गुरु रहमान कहलनि जे ओ एहि फैसला केर खिलाफ सुप्रीम कोर्टमे याचिका दायर करताह।
जनतब जे 70वीं बीपीएससी केर प्रारंभिक परीक्षा 13 दिसंबर 2024 केँ भेल छल। मात्र पटनाक एकटा सेंटर बापू परीक्षा परिसरमे परीक्षा दोबारा चारि जनवरी 2025 केँ लेल गेल छल। अभ्यर्थी सभक मांग छल जे फेरसँ परीक्षा लेल जाय। हालाँकि आयोग अपन जवाबमे कोर्टकेँ कहलक जे याचिकाकर्ता सभक सभ आरोप गलत अछि। किछु गड़बड़ी नहि भ’ रहल अछि। एहि केर बाद कोर्ट पीटी परीक्षा केर रिजल्ट पर रोक लगाबयसँ इनकार कय देने छल। जनतब जे 70वीं बीपीएससी केर पीटी परीक्षाकेँ रद्द करबाक याचिका पर 19 मार्चकेँ पटना हाईकोर्टमे सुनवाई भेल छल। ओहि समय फैसला सुरक्षित राखल गेल छल। काल्हि जखनि फैसला आओल तँ भोरेसँ अभ्यर्थी सभक नजरि टिकल छल जे संभवतः हुनकर पक्षमे फैसला आओत, मुदा एहेन नहि भेल। वर्तमानमे पटना हाईकोर्ट केर फैसला अभ्यर्थी सभकेँ पैघ झटका देलक अछि।
