विधि-व्यवस्था 18 अवैध हथियार आ 22 कारतूस सहित 504 आरोपी गिरफ्तार भेल जाहिमे 363 आरोपी गेल जहल – उपेन्द्र नाथ वर्मा Maithil Punarjagran Prakash January 11, 2024January 11, 2024 0 Comments सहरसा समदिया * जिला स्थित विकास भवन केर सभागारमे मासिक अपराध संगोष्ठीक आयोजन सोम दिन कयल गेल। एहि संगोष्ठीक अध्यक्षता पुलिस अधीक्षक उपेन्द्र नाथ वर्मा कयलनि। एहि बैसारमे पुलिस उप अधीक्षक मुख्यालय, समस्त अनुमंडल पुलिस अधिकारी, सर्कल इंस्पेक्टर, थाना प्रमुख, यातायात, लोक अभियोजक, एएलटीएफ आ वज्र वाहन प्रभारी उपस्थित छलाह। पुलिस अधीक्षक कहलनि जे, दिसम्बर मासमे अवैध हथियार केर खिलाफ चलाओल अभियानमे 18 अवैध हथियार आ 22 जीवित कारतूस जब्त कयल गेल अछि। संंगहि जनता दरवारमे 175 लोक केर शिकायत पर कार्रवाई कयल गेल। दिसम्बर मासमे 504 आरोपी गिरफ्तार भेल जाहिमे 363 आरोपी कए जहल भेजल गेलप। ओतहि दिसम्बर मासमे कुल चारि गोट शातिर अपराधी सेहो गिरफ्तार भेल। एही मासमे डकैती नहि, लूटिक 3 मामिला, 2 हत्या, 20 हथियार अधिनियम आ 1 बलात्कारक मामला दर्ज भेल। संगहि पंचायत उपचुनाव बिना कोनो घटनाक शांतिपूर्ण तरीकासँ संचालित कयल गेल। निषेधसँ जुड़ल कुल 259 मामिलामे 262 आरोपी कए कोर्टसँ सजा देलक। गुंडापंजीमे 36 आरोपीक नाम दर्ज भेल आ 1 गोटेकेँ फरार घोषित कयल गेल। शराब निषेध मामिलामे 733.250 लीटर देशी शराब आ 2304.440 लीटर विदेशी शराब जब्त कयल गेल। संगहि हत्याक मामिला मे 6 आरोपी केर गिरफ्तार कय जहल भेजल गेल। जखन कि पुलिस दबिश आर ताबड़तोड़ छापामारीक कारण 10 अपराधी कोर्टमे आत्मसमर्पण कय देलक। दिसंबर मासमे यातायात नियमक उल्लंघनक कुल 4 लाख 53 हजार टकाक चालान जारी कयल गेल। डायल 112 सेवामे कुल 607 कॉल आयल। जिनकर औसत प्रतिक्रिया समय 7 मिनट 55 सेकेंड छल। दिसंबर मासमे जमीनक विवादसँ जुड़ल कुल 91टा नव मामिला दर्ज कयल गेल। जाहिमे पिछला आ नव प्राप्त मामिलामे सँ कुल 188 मामिला केँ निष्पादित कयल गेल।थानाध्यक्ष सौर बाजार आ सिमरीबख्तियारपुर, ओपी अध्यक्ष पतरघट केर बेहतर काज लेल प्रशस्ति पत्रसँ सम्मानित कयल गेल। Spread the love
