माध्यमिक शिक्षाक प्रबंधनक हेतु दसवीं आ बारहवीं कक्षाक राज्य बोर्ड केर विलय कय नव बोर्ड बनेबाक प्रस्ताव आई सदनमे राखल गेल। एकर अलावा शोणितपुर आ कोकराझार जिलामे राज्य सरकार द्वारा संचालित दू टा नया विश्वविद्यालयक स्थापना लेल सेहो दू टा अलग-अलग प्रस्ताव पेश कयल गेल।
असमक शिक्षा मंत्री डॉ. रनोज पेगुक तरफसँ संसदीय मामिला मंत्री पीयूष हजारिका राज्यमे बारहवीं कक्षा तकक शिक्षा प्रणाली पर नियंत्रणक लेल एकटा नव बोर्ड बनेबाक लेल असम राज्य विद्यालय शिक्षा बोर्ड विधेयक, 2024 विधानसभामे पेश कयलनि। एहि विधेयकक अनुसार असम माध्यमिक शिक्षा बोर्ड (सेबा) आ असम उच्चतर माध्यमिक शिक्षा परिषद (एएचएसईसी) केल विलय कए एकटा नव बोर्ड असम राज्य विद्यालय बोर्ड (एएसएसईबी) बनाओल जाएत। ई विधेयक मौजूदा असम माध्यमिक शिक्षा बोर्ड आ असम उच्चतर माध्यमिक शिक्षा परिषदक विलय कय राज्यमे माध्यमिक शिक्षा विनियमित पर्यवेक्षण आ विकासक लेल आनल जा रहल अछि।
दोसर दिस डॉ. पेगुक तरफसँ दूटा अलग-अलग विधेयक पेश करैत मंत्री हजारिका शोणितपुर जिलाक गोहपुरमे शहीद कनकलता बरुवा राज्य विश्वविद्यालय आ कोकराझारमे कोकराझार विश्वविद्यालयक स्थापनाक सरकारक योजनाक खुलासा कयलनि। शहीद कनकलता बरुवा राज्य विश्वविद्यालय विधेयक 2024 केर अनुसार ई शैक्षिक आवासीय आ संबद्ध विश्वविद्यालयक लेल मुक्त आ दुरस्त शिक्षा सुविधा वाला संस्था होयत। जखन कि कोकराझार विश्वविद्यालय विधेयक 2024 मे कहल गेल अछि जे मौजूदा कोकराझार सरकारी महाविद्यालय केर विकसित कए एकर निर्माण कयल जाएत। ई शिक्षण, शोध उन्मुख, संबद्ध आ अर्ध-आवासीय विश्वविद्यालय होयत। एहि विश्वविद्यालयक तहत एकटा मुक्त आ दूरस्थ शिक्षा केंद्र सेहो बनत।
उच्च शिक्षा विभागक अनुसार असममे कुल 22 टा विश्वविद्यालय अछि, जाहिमे सँ 14 टा राज्य सरकार संचालित अछि। एकर अलावा दूटा केंद्रीय आ छः टा निजी विश्वविद्यालय अछि।
