सैटेलाइट टाउनशिपक विरोधमे पटनामे किसान सभक जमिकऽ प्रदर्शन

पटना । समदिया

राजधानी पटनामे मंगलदिन एक दिसि छात्रसभक प्रदर्शन चलि रहल छल, तँ दोसर दिसि हजारों किसान सेहो अपन मांग लऽ सड़क पर उतरि गेलाह। पाटलिपुत्र ग्रीनफील्ड सैटेलाइट टाउनशिपक लेल प्रस्तावित जमीनक अधिग्रहणक विरोधमे किसान गांधी मैदानसँ मुख्यमंत्री आवासक घेराव लेल निकललाह। एहि दौरान शहरमे एकहि समयमे अनेक संगठनक मार्च होएबाक कारणेँ स्थिति किछु देर लेल उहापोहपूर्ण बनि गेल।

प्रदर्शनमे शामिल पुनपुन, नौबतपुर आ आसपासक क्षेत्रसँ आएल किसानसभक कहब छलनि जे सरकार खेतीयोग्य जमीनक उपयोग सैटेलाइट सिटी निर्माण लेल नहि करय। किसानसभ कहलनि जे एहि उपजाऊ जमीनपर सालमे तीन-तीन बेर फसल होइत अछि आ परिवारक आजीविका मुख्य रूपसँ खेती पर निर्भर अछि।

एकटा प्रदर्शनकारी ग्रामीण कहलनि, “पाटलिपुत्र सैटेलाइट सिटी नहि बनबाक चाही, किएक तँ एहि खेतसँ हमसभ सालमे तीन फसल उपजाबैत छी। ई हमर जमीन अछि, एहि जमीनक सहारासँ बेटी-बेटाक पढ़ाई आ विवाह होइत अछि। हमसभ अपन जमीन सरकारकेँ नहि देब।”

किसानसभसँ अधिकारीक वार्ता

प्रदर्शनक दौरान किसान प्रतिनिधिसभकेँ समझेबाक आ हुनकर मांग सुनबाक लेल जिला प्रशासनक वरिष्ठ अधिकारी सेहो पहुंचलाह। डीएम, एसएसपी आ अन्य पुलिस अधिकारी किसान प्रतिनिधिसभसँ बातचीत कयलनि।

किसान नेता सभक कहब छलनि जे हुनकर प्रदर्शन छात्रसभक आंदोलनक हिस्सा नहि अछि, बल्कि ओ सभ विशेष रूपसँ सैटेलाइट टाउनशिपक लेल जमीनक मुद्दापर अपन विरोध दर्ज कराबऽ आएल छथि। एकहि दिन आ एकहि समयमे विभिन्न प्रदर्शन होएब महज संयोग अछि।

की अछि पूरा मामला ?

बिहार सरकार राज्यक विभिन्न क्षेत्रमे 12टा सैटेलाइट टाउनशिप विकसित करबाक योजना पर काज कऽ रहल अछि। एहि योजना अंतर्गत जमीनक अधिग्रहण आ भू-स्वामित्वक मुद्दापर किसानसभमे नाराजगी देखल जा रहल अछि।

पाटलिपुत्र ग्रीनफील्ड सैटेलाइट टाउनशिपकेँ करीब 30 सेक्टरमे विकसित करबाक प्रस्ताव अछि। सरकार जमीन उपलब्ध कराबऽ लेल विभिन्न मॉडलपर विचार कऽ रहल अछि, जाहिमे लैंड पुलिंग, आपसी समझौता, हाइब्रिड मॉडल आ जमीन खरीद अथवा अधिग्रहण शामिल अछि।

भू-स्वामीसभसँ लगातार संवाद करत सरकार

नगर विकास आ आवास मंत्री नीतीश मिश्रा कहलनि जे विभाग किसान आ भू-स्वामीसभक बीच जा कऽ योजनाक विभिन्न पहलूक विस्तृत जानकारी देत। संगहि, प्रभावित लोकसभक सुझाव आ विचारकेँ गंभीरतासँ सुनल जाएत।

हुनका अनुसार, योजनाक सफलता व्यापक जनभागीदारी आ लगातार संवाद पर निर्भर करैत अछि। विशेष रूपसँ ओहि भू-स्वामीसभसँ प्रत्यक्ष बातचीत कयल जाएत, जिनकर जमीन योजनाक दायरामे आबि रहल अछि। सरकारक कोशिश अछि जे हुनकर सहभागिता आ सहमतिक संगहि योजनाकेँ आगू बढ़ाओल जाए।

मंत्री स्पष्ट कयलनि जे किसान आ भू-स्वामीसभसँ संवाद केवल एकटा बैठक धरि सीमित नहि रहत। विभाग आगू सेहो प्रभावित क्षेत्रमे जा कऽ लोकसभकेँ योजनाक बारेमे जानकारी देत आ हुनकर राय लेत।

9 प्रखंडक 273 गाम योजनाक दायरामे

पाटलिपुत्र ग्रीनफील्ड सैटेलाइट टाउनशिपक प्रस्तावित क्षेत्र करीब 81,730 एकड़मे पसरल होयत। एहि योजनाक दायरामे कुल 9 प्रखंडक 273 गाम शामिल अछि।

एहि प्रखंडसभमे पुनपुन, नौबतपुर, मसौढ़ी, फतुहा, संपतचक, पटना ग्रामीण, धनरुआ, दनियावां आ फुलवारी शामिल अछि। एकर अतिरिक्त विशेष क्षेत्रक रूपमे नौबतपुर नगर पंचायतक आंशिक क्षेत्र आ पुनपुन नगर पंचायतक पूरा क्षेत्र सेहो प्रस्तावित अछि।

टाउनशिपक भीतर करीब 3,008 एकड़क कोर एरिया विकसित करबाक योजना अछि, जाहिमे पुनपुन प्रखंडक 19टा गाम शामिल होयत।

निवेश आ रोजगारक अवसरक उम्मीद

सरकारक अनुसार, पाटलिपुत्र सैटेलाइट टाउनशिपक विकाससँ सार्वजनिक आ निजी दुनू क्षेत्रसँ पैघ पैमानापर निवेश आकर्षित भऽ सकैत अछि। नव शहरी क्षेत्रमे आवास, व्यापार, शिक्षा, स्वास्थ्य, परिवहन, बाजार आ सेवा क्षेत्रक विस्तारसँ आर्थिक गतिविधिमे तेजी अयबाक संभावना अछि।

एहि परियोजनासँ प्रत्यक्ष आ अप्रत्यक्ष रूपसँ रोजगारक नव अवसर पैदा होयबाक सेहो उम्मीद अछि। आसपासक क्षेत्रमे व्यापारिक गतिविधि बढ़बाक आ स्थानीय अर्थव्यवस्थाकेँ गति भेटबाक संभावना व्यक्त कयल जा रहल अछि।

‘बेहतर शहर, बेहतर अवसर, बेहतर बिहार’क परिकल्पना

बिहार सरकार पाटलिपुत्र ग्रीनफील्ड सैटेलाइट टाउनशिपकेँ भविष्यक शहरी विकासक एकटा मॉडलक रूपमे विकसित करबाक योजना बना रहल अछि। एहि योजनामे गुणवत्तापूर्ण आवास, सुगम आ सुरक्षित सार्वजनिक परिवहन, आधुनिक शिक्षा आ स्वास्थ्य सुविधा, स्वच्छ आ हरित वातावरण आ बेहतर नगर सेवाक समेकित व्यवस्था पर जोर देल जाएत।

मुदा, दोसर दिसि किसानसभक स्पष्ट विरोधसँ सरकारक समक्ष एहि परियोजनाकेँ आगू बढ़ाबऽसँ पहिने प्रभावित लोकसभक विश्वास जीतबाक पैघ चुनौती अछि। आब आगूक दिनमे सरकार आ किसानसभक बीच होबऽवला संवादसँ एहि विवादक कोनो समाधान निकलैत अछि कि नहि, एहि पर सभक नजरि बनल रहत।