विपक्षी सांसदक धरना, राहुल गांधी कहलनि – ‘वोट चोरी’ पर सवाल करब, केओ बचत नहि

नई दिल्ली । समदिया

लोकसभामे विपक्षी नेता राहुल गांधीकेँ नेतृत्वमे इंडिया गठबंधनक सांसद सभ चुनाव आयोगक कार्यालयक दिसि मार्च करैत आकाशवाणी भवन परिसरमे धरना देलनि। पुलिस बैरिकेड लगाकऽ सांसद सभकेँ चुनाव आयोगक कार्यालय धरि जाएसँ रोकलक।

राहुल गांधी कहलनि जे करीब 300 सांसद मुख्य चुनाव आयुक्त ज्ञानेश कुमारसँ भेट कऽ ‘वोट चोरी’ संबंधी सवाल पूछय चाहैत छथि, मुदा हुनका सभकेँ रोकल जा रहल अछि। ओ कहलनि, ‘‘जँ निर्वाचित प्रतिनिधि चुनाव आयोगसँ नहि भेटि सकैत छथि तँ लोकतंत्रक की अर्थ ?’’

प्रदर्शनक दौरान सांसद सभ ‘लोकतंत्र बचाउ’ लिखल बैनर आ तिरंगा लऽ कऽ नारा लगौलनि। बैरिकेड पर चढ़ि राहुल गांधी राष्ट्रीय ध्वज सेहो फहरौलनि। ओ आरोप लगौलनि जे चुनाव प्रक्रियामे अनियमितताक जिम्मेदार लोक सभ पर कार्रवाई होयत आ ‘‘केओ बचत नहि।’’

दिल्ली पुलिस आ सुरक्षा बलक भारी तैनातीमे ई प्रदर्शन भेल।