समाजक सभ वर्गकेँ जोड़ि ‘विकसित भारत 2047’ केर सपना पूरा करब : नितिन नवीन

नई दिल्ली । समदिया

भारतीय जनता पार्टीक राष्ट्रीय अध्यक्ष नितिन नवीन सोमदिन नई दिल्ली स्थित तालकटोरा स्टेडियममे आयोजित ‘समरसता संकल्प अभियान’ अंतर्गत पावन माटी कलश वंदन आ वितरण कार्यक्रमकेँ संबोधित करैत कहलनि जे अभियानक मुख्य उद्देश्य संत शिरोमणि रविदासजीक सामाजिक समरसता, समानता आ निष्काम कर्मक विचारकेँ जन-जन धरि पहुँचेनाइ अछि।

ओ कहलनि जे प्रधानमंत्री नरेंद्र मोदीक नेतृत्वमे विकासक योजनाक लाभ गरीबसँ लऽ कऽ समाजक अंतिम पांतिमे ठाढ़ व्यक्तिधरि पहुँचि रहल अछि। हुनक अनुसार, सरकारक प्रयाससँ 25 करोड़ लोककेँ गरीबीसँ बाहर निकालल गेल अछि। भाजपा समाजक सभ वर्गकेँ संग लऽ कऽ वर्ष 2047 धरि ‘विकसित भारत’क लक्ष्य साकार करबाक संकल्प लेने अछि।

नितिन नवीन कहलनि जे संत शिरोमणि रविदासजीक 650म जयंती पूरा भाजपा परिवार प्रधानमंत्री मोदीक विचार आ संकल्पक अनुरूप मना रहल अछि। एहि पवित्र अभियानमे समाजक सभ वर्गक लोक सहभागी भऽ रहल छथि। ओ उपस्थित लोकसभक अभिनंदन करैत कहलनि जे 29 जुलाईकेँ गुरु पूर्णिमाक पावन अवसर पर एहि अभियानक शुरुआत कएल गेल छल।

ओ कहलनि, “गुरु पूर्णिमाक दिन अभियानक शुरुआत करबाक उद्देश्य ई छल जे गुरुसभक आशीर्वादसँ संत शिरोमणि रविदासजीक जयंतीसँ जुड़ल एहि अभियानकेँ सफलता भेटय।” हुनका अनुसार, बनारससँ शुरू भेल कार्यक्रममे देशक विभिन्न राज्यमे सँ लोक सहभागी भेल छलाह। उत्तर प्रदेशक मुख्यमंत्री योगी आदित्यनाथ स्वयं उपस्थित भऽ कऽ अभियानमे सहभागिता देने छलाह, जखनकि केंद्रीय मंत्री अर्जुन मेघवाल एकर शुरुआत कएलनि।

भाजपा अध्यक्ष कहलनि जे भारत संत आ महापुरुषसभक भूमि अछि। देशमे जखनि-जखनि असमानता आ संकट आएल अछि, तखनि-तखनि संत-महापुरुषसभक विचार आ आशीर्वाद समाजकेँ सही दिशा देने अछि। प्रधानमंत्री मोदीक ‘सबका साथ, सबका विकास, सबका विश्वास आ सबका प्रयास’क मूल मंत्र सेहो भारतीय संत परंपरा आ सामाजिक समरसताक विचारसँ प्रेरित अछि।

नितिन नवीन कहलनि जे संत रविदासजी ओहि समय समाजमे समानताक संदेश देलनि, जखनि समाज ऊँच-नीचक भेदभाव आ अनेक कुरीतिसँ जकड़ल छल। हुनकर विचार आ प्रयास सामाजिक असमानतापर कठोर प्रहार कऽ देशमे सामाजिक समरसताक मजबूत नींव रखलक। भाजपा एहि समरसता संकल्प अभियानक माध्यमसँ हुनक विचारकेँ आगाँ बढ़ाबऽ चाहैत अछि।

ओ कोरोना कालक चर्चा करैत कहलनि जे ‘प्रधानमंत्री गरीब कल्याण अन्न योजना’क तहत गरीब परिवारसभकेँ प्रति व्यक्ति पाँच किलो मुफ्त अनाजक व्यवस्था कएल गेल, जाहिसँ कोनो व्यक्ति भूखल नहि सूतय। ओ कहलनि जे 25 करोड़ लोककेँ गरीबी रेखासँ बाहर निकालबाक प्रयास सेहो संत रविदासजीक समानता आ मानवीय गरिमाक विचारकेँ व्यवहारमे उतारबाक दिशा अछि।

भाजपा राष्ट्रीय अध्यक्ष अंतमे कहलनि जे प्रधानमंत्री मोदीक दूरदृष्टि आ संत शिरोमणि रविदासजीक आदर्शकेँ आधार बना कऽ समरसताक भावसँ समाज आ देशक विकासक काज कएल जाएत। ओ जोर दैत कहलनि जे “समाजक हर वर्गकेँ संग जोड़ि हमसभ 2047 धरि विकसित भारतक सपना जरूर पूरा करब।”