संसदमे SC-ST सांसदकेँ कम समय देबाक मुद्दा उठौलनि मांझी
गयाजी । समदिया
केंद्रीय मंत्री जीतन राम मांझी लोकसभा अध्यक्ष ओम बिरलाकेँ पत्र लिखि संसदमे अनुसूचित जाति (SC) आ अनुसूचित जनजाति (ST) सांसदकेँ बाजबाक कम समय भेटबाक मुद्दा उठौलनि अछि। मांझी कहलनि जे ई मुद्दा 5 अगस्तकेँ हुनकर आवास पर भेल एनडीए सांसदसभक बैठकमे उठल छल।
मांझीक अनुसार, मध्य प्रदेशक खरगोनसँ भाजपा सांसद गजेंद्र सिंह पटेल एहि विषयकेँ बैठकमे रखने छलाह। सांसदसभक उठाओल समस्याकेँ संबंधित मंत्रालय धरि पहुँचेनाय समूहक नेता होयबाक नाते हुनकर जिम्मेदारी अछि। एहि क्रममे ओ लोकसभा अध्यक्षकेँ पत्र लिखलनि।
मांझी स्पष्ट केलनि जे पत्रमे उठाओल बात हुनकर व्यक्तिगत मत नहि, बल्कि सांसदसभ द्वारा उठाओल मुद्दा अछि। ओ कहलनि जे एहि मामिलामे कोनो राजनीतिक उद्देश्य नहि अछि।
ज्ञानेश कुमारक मुद्दा पर सेहो प्रतिक्रिया
मांझी चुनाव आयुक्त ज्ञानेश कुमारसँ जुड़ल विवाद पर कहलनि जे चुनाव आयोगक भीतर सहमति-असहमतिकेँ लऽ कऽ सवाल उठेनिहार लोक अनुभवहीन छथि। हुनकर कहब छल जे कोनो संस्थामे निर्णय प्रक्रियाक दौरान अलग-अलग मत आबि सकैत अछि, मुदा अन्तिम निर्णय अधिकारप्राप्त व्यक्ति द्वारा लेल जाइत अछि आ ओकर पालन होइत अछि।
