वैशालीमे पहिल बेर अंतर्राष्ट्रीय बौद्ध सम्मेलन, 11 दिसम्बरसँ तीन दिवसीय आयोजन
वैशाली । समदिया
बिहारक ऐतिहासिक वैशालीमे 11 सँ 13 दिसम्बर 2026 धरि पहिल बेर अंतर्राष्ट्रीय बौद्ध सम्मेलन आयोजित होयत। बुद्ध सम्यक दर्शन संग्रहालय-सह-स्मृति स्तूप परिसरमे होबयवला एहि सम्मेलनमे म्यांमार, थाईलैंड, लाओस, जापान आ दक्षिण कोरिया सहित कतेको देशक बौद्ध भिक्षु, धर्मगुरु आ विद्वान भाग लेताह।
सम्मेलनक तैयारीक समीक्षा लेल मुख्य सचिव प्रत्यय अमृत आ विकास आयुक्त मिहिर कुमार सिंहक संयुक्त अध्यक्षतामे उच्चस्तरीय बैठक भेल। आयोजन स्थल पर सुगम आवागमन, निर्बाध बिजली आ स्वास्थ्य सुविधाक व्यवस्था सुनिश्चित करबाक निर्देश देल गेल अछि।
देश-विदेशक प्रतिनिधि लेल वैशालीमे आधुनिक सुविधासँ युक्त ‘टेंट सिटी’ बनाओल जा रहल अछि। पटना एयरपोर्ट आ पटना जंक्शन पर 24 घंटा सहायता डेस्क सेहो रहत।
तीन दिवसीय सम्मेलनमे त्रिपिटक पाठ, बौद्ध विरासत पर विमर्श, हेरिटेज वॉक, सांस्कृतिक कार्यक्रम आ बिहारक हस्तशिल्पक प्रदर्शनी आयोजित होयत। 14 अंतर्राष्ट्रीय विद्वानक सहभागिताक सहमति सेहो भेटि गेल अछि।
