राघोपुरमे 22 मजदूरसँ भरल नाव पलटल, 20 गोटेक रेस्क्यू; 2 गोटेक खोजमे SDRFक अभियान जारी

भागलपुर । समदिया

भागलपुर पुलिस जिला नवगछियाक खरीक प्रखंड अन्तर्गत राघोपुरमे बुधदिन तटबन्ध मरम्मति अर्थात् फ्लड फाइटिंगक काजक दौरान एकटा पैघ नाव दुर्घटना भेल। गंगाक तेज धारमे मजदूरसभसँ भरल नाव असन्तुलित भऽ कऽ पलटि गेल। नाव पर करीब 22 गोटे मजदूर सवार छलाह। दुर्घटनाक बाद घटनास्थल पर चीख-पुकार मचि गेल।

घटनाक सूचना भेटिते घटनास्थल पर तैनात एसडीआरएफक दल तुरन्त रेस्क्यू अभियान शुरू कयलक। दलक जवानसभ तेज बहावक बीच अभियान चला कऽ 20 गोटे मजदूरकेँ सकुशल बाहर निकालि लेलनि। मुदा एखनहुँ दू गोटे मजदूर लापता छथि, जिनकर खोजमे गोताखोर आ एसडीआरएफक दल लगातार सर्च अभियान चला रहल अछि।

गंगाक तेज धारमे नाव भेल असन्तुलित

जानकारीक अनुसार, मजदूरसभ राघोपुर क्षेत्रमे तटबन्धकेँ बचाबय लेल चलि रहल फ्लड फाइटिंगक काजमे लागल छलाह। एहि दौरान मजदूरसभकेँ लऽ कऽ जा रहल नाव गंगाक तेज धारमे अचानक असन्तुलित भऽ गेल आ पलटि गेल। नाव पलटिते अफरातफरी मचि गेल आ कतेको मजदूर अपन जान बचाबय लेल पानिमे कूदि पड़लाह।

दू दिन पहिने टूटल छल राघोपुर तटबन्ध

राघोपुर क्षेत्रमे विगत किछु दिनसँ बाढ़ि आ कटावक गम्भीर खतरा बनल अछि। करीब दू दिन पहिने राति लगभग दू बजे एहि क्षेत्रमे तटबन्धक एकटा पैघ हिस्सा टूटि गेल छल। तकर बाद जल संसाधन विभाग आ स्थानीय प्रशासनक देखरेखमे तटबन्धक मरम्मतिक काज युद्धस्तर पर चलि रहल छल। एहि मरम्मतिक काजक दौरान ई नाव दुर्घटना भेल।

घटनास्थल पर अधिकारीसभक कैम्प

दुर्घटनाक गम्भीरताकेँ देखैत पुलिस आ प्रशासनक वरीय अधिकारी तुरन्त घटनास्थल पर पहुँचि गेलाह। नवगछिया एसडीपीओ अनिकेत अमर, डीसीएलआर शैलेन्द्र कुमार, खरीकक बीडीओ, सीओ, खरीक थानाध्यक्ष आ जल संसाधन विभागक वरीय अधिकारी घटनास्थल पर कैम्प कऽ रहल छथि।

प्रशासनक पहिल प्राथमिकता एखनि लापता दुनू मजदूरक जल्दी पता लगेनाइ अछि। एसडीआरएफ आ गोताखोरक दल गंगाक तेज धारमे लगातार खोज अभियान चला रहल अछि।